2018-12-23
【麗都米線】 小鍋米線 | 屯門

今日唔知做乜鬼,本熊少爺幫個朋友準備嚟緊星期日佢結婚啲嘢,仲好忙過平時返工!香港九龍新界走運晒!就算連續兩次返到公司樓下,都上唔到樓就收到個朋友電話,話佢漏咗嘢叫我幫佢手去拎⋯⋯最大鑊仲係要我幫佢飛車走入去天水圍添!下午茶時間都過咗但都未有得食早餐同晏晝嘅我,有理冇理求奇喺屯門停低,搵個咪錶位泊好車,求其見到間米線舖就走咗入去填飽個肚,估唔到本熊少爺好似餓狗搶屎咁,一次過鯨吞咗兩碗米線!