Menu & Search
雞骨薯仔米粉 紅磡 ・ 美味佳

雞骨薯仔米粉 紅磡 ・ 美味佳

突然間諗起公司嗰隻日本分部介紹過,附近有一間叫做 美味佳 嘅小店收得好夜……


雞骨薯仔米粉 紅磡 ・ 美味佳

啱啱上個星期有幾日都喺紅館幫手,晚晚都搞到三更半夜,其中一晚我哋揸咗架車近近地落去 紅磡 諗住食牛肉拉麵先返屋企!明明記得佢話收凌晨兩點,點知一點未夠就已經收咗工!突然間諗起公司嗰隻日本分部介紹過,附近有一間叫做 美味佳 嘅小店收得好夜!於是乎我哋一夥人浩浩蕩蕩衝咗過去,拍好車諗住速食啲嘢之後就返屋企!

 

豬皮蘿蔔、豬大腸、魚蛋新竹米粉~

成碗車仔麵真係有驚喜!先由個湯講起,佢係用薯仔同雞骨、內臟慢慢淆出嚟,上枱嘅時候有大大嚿薯仔跟埋一齊煲湯雞。佢哋用上少有嘅台灣新竹米粉,個米粉浸落啲湯度好夾!其他車仔麵配料都係嗰啲嘢啦⋯⋯冇乜值得講!但係佢個湯同米粉係唯一令到我會再返嚟呢間舖頭幫襯嘅食物!不得不提佢杯涼茶唔甜得嚟味道有啲似無涼粉嘅楊協成清涼爽⋯⋯幾好飲!

 

蛋炒腸粉~

腸粉內冷外熱!包腸粉嘅時候嗰油喺裏面因為冇受熱逼唔到出嚟有一浸好臭嘅油味!唔知係唔係阿姐趕時間求其煎出嚟就算數!衰啲講句我自己買腸粉返屋企整都好食過佢!其實炒腸粉又有乜嘢難道呢?點解可以整到咁難食?

 

串燒~

日本分部除咗介紹我食呢度個炒腸粉外,串燒都一定要試!但唔係又係嗰啲嘢,冇乜特色或者根本稱唔上好食!只不過係唔難食放得入口⋯⋯不提也罷!

串燒芥蘭~

但不得不獨立講佢條串燒芥蘭,都唔知邊個芥蘭聰明介紹我一定要食呢度嗰個燒芥蘭,擺入口第一啖我即時想捉住介紹俾我嗰個人燒佢個芥蘭!芥蘭啲葉基本上已經燒燶咗,加埋啲辣椒粉嚟燒我淨係食到燶咗嘅苦味!

 

後記:呢間舖頭唯一可取之處就係佢開得夜!揸架車泊喺佢門口食碗米粉都仲可以嘅,其他嘢我就真係覺得叫少少嚟食冇乜所謂,但係真係唔會特別走去嗌嚟食囉!喺我角度完全係可叫可唔叫都冇乜所謂!

 

 

美味佳 | 紅磡寶其利街 2 號地舖