Menu & Search
【麪名都未識讀】 有緣小敍

【麪名都未識讀】 有緣小敍

疫症問題令到今年好多公司嘅生意都一蹶不振,本熊少爺公司亦都唔例外⋯⋯好彩好友趷趷剛公司接到啲生意,我可以過去幫佢手。最近每日都要留守喺中環返工!仲要喺正想當年留下不少腳毛嗰幢大廈附近開工,當年喺西環收工後,一星期總有幾晚會去嘅喜喜、Sugar 都相繼結業!點知沿途行過老蘭,連熟悉的 Volar 都已經不再存在。德己立街成條斜路已經變到面目全非。


事緣熊人仔有個朋友仔嘅媽媽,知道我喺中環返工,即刻介紹我一定要試一間小店,佢噏嚟噏去都噏唔到條街名,好彩本熊少爺話晒曾幾何時都好熟悉呢一頭。佢一講我就知,佢講緊嘅係想當年主編老死仲喺中環中心返工嘅時候,會約佢走去食豚王嗰一條街!行到街尾竟然見到細細嘅舖頭,門外排滿人。好彩我自己一隻去食唔使等位,就即刻入到去坐低開餐⋯⋯

麻醬青瓜~

我好似喺呢一個專欄已經唔係第一次講,我對中式麻醬嘅堅持!事緣我真係見過坊間有啲中式餐廳貪方便,同埋話迎合香港人嘅口味,改用日式麻醬嚟整麻醬撈麵,同埋雞絲粉皮⋯⋯搞到完全唔係嗰樣嘢!但係呢度呢個麻醬濃濃嘅麻香撲鼻,基本上每一舊青瓜面頭嘅麻醬,都杰撻撻咁樣包住整舊青瓜!

腊汁肉夾膜~

喺香港搵到嘅肉夾膜,都係一啲變得迎合左香港人口味。但係呢度食嘅,好似之前仲北上到嘅時候食到嘅嗰種口感同味道!味道唔算好出眾但係食得到應有嘅味道。

羊肉餃秘製麻辣麵~

唔知係唔係食慣咗重慶、雲南、四川嗰啲麻辣麵,呢度嘅麻辣湯麵,俾我感覺上個湯有少少怪怪地,唔係我杯茶!羊肉餃一碗得三隻有點到喉唔到肺!

金沙骨 BiángBiáng 麵~

一心諗住可能冇下次嘅時候,朋友仔同我講叫我應該要試埋佢個撈麵!所以第二日我再走過來試埋佢個撈麵!基本上係一碗闊闊長長嘅麵條撈麵!麵條上邊放咗金蒜、芫荽、蔥粒、醬油、辣椒粉、辣椒油、黑醋、炸紫菜、生菜、木耳絲等等等等材料。食之前要徹底咁樣將所有嘢撈勻。金沙骨出嚟感覺似滷水豬軟骨,同我心目中酥炸嘅金沙骨好似係完全兩種東西!但係整體來講,呢一碗完全唔識讀佢個名嘅撈麵真係好好味!不過佢個份量,食完之後好似食咗陣風一樣有點空虛!

hogarhk #羆食堂 #肥熊人UMA


後記|本熊少爺分別連續兩日去呢間餐廳度食食晏晝!一日係午飯時間,另外一日係午市過後!午市時間整體來講成間狹窄嘅舖頭裏面,只係得外國人同好乸多講普通話嘅男男女女喺度幫襯。我都係建議午市過後,冇乜人嘅時候先好去幫襯。間嘢啲食物嚟講整體上,味道都算 OK。但係佢嗰個招牌撈麵,本熊少爺孤陋寡聞又冇受過教育⋯⋯既唔識讀易唔識寫!


有緣小敍|中環和安里 14-15 號地下 B 舖

唔想錯過我哋嘅內容,記得贊好 hogar.hkFacebook 專頁youtube 頻道 !