Menu & Search
【無水海鮮鍋】   冇得出街飯聚唯有匿喺屋企自己食自己!

【無水海鮮鍋】 冇得出街飯聚唯有匿喺屋企自己食自己!

呢個星期,延續上個禮拜嗰個餸嘅精神,用鑄鐵煮一個無水海鮮鍋,同樣一樣好 Hea 地倒晒材料落去個煲度,再睇住時間等佢煮熟就得,而且仲唔需要理佢,夠鐘就熄火就攪掂!


疫情問題令到戲院停開了一段時間,之後重開一時三刻未有新戲上畫,所以有啲院線開始播返啲舊片,今個星期六竟然上影返《流氓醫生》!呢套電影喺本熊少爺中學年代開始,就好鍾意睇 UFO 出品嘅電影之一!見到佢喺戲院放映,真係即時有衝動走去買飛入場睇。無奈嗰日要帶熊人仔去上興趣班,唯有打消呢一個念頭!今個星期就為大家推介一下戲裏面嘅其中一隻戲裡面好重要嘅歌〈Crazy〉(編按:片內版本是翻唱)

#hogarhk #羆食堂 #肥熊人UMA

材料

肉蟹~ 1 隻

鮑魚仔~ 7 隻

蟶子仔~ 半斤

大蜆~ 半斤

海蝦~ 半斤

急凍北海道帶子~ 4 粒

急凍廣島蠔~ 4 隻

豆腐~ 1 磚

旺菜~ 1 棵

草菇、翠玉瓜、芫荽、羅勒、泰國粉絲~ 適量

究竟要點煮?

將海鮮徹底洗乾淨,將蔬菜斬件;

鑄鐵鍋底部放油防止粘底;

可以一層層將啲材料隨心咁放入鑄鐵鍋;

底層我建議先放翠玉瓜同菜,跟住先至放豆腐同粉絲;

跟住嗰一層放啲較慢熟嘅海鮮,例如蝦、蟹、鮑魚;

最頂層就放蜆、蟶子、帶子、蠔;

最後擺少少羅勒、黑椒同海鹽調一調味;

蓋上煲蓋,以中火煮 15 分鐘熄火,之後打開蓋放芫荽再焗佢兩三分鐘,跟住原煲上枱。


後記其實大家去買餸嘅時候,完全唔需要跟以上嘅材料,食材可以視乎個人口味自由配搭!不過不得不提,食完海鮮係個煲裏面嗰啲湯,先至係成個煲嘅精華所在!


唔想錯過我哋嘅內容,記得贊好 hogar.hk Facebook 專頁youtube 頻道 !