Menu & Search
【鮮茄焗豬扒飯】 冇得出街飯聚唯有匿喺屋企自己食自己!

【鮮茄焗豬扒飯】 冇得出街飯聚唯有匿喺屋企自己食自己!

今個禮拜,本熊少爺除咗見客之外,都繼續係留喺屋企在 WFH!晚飯時間,諗住簡簡單單煮個西蘭花同煎豬扒、牛扒食意粉!但係熊人仔無端端好堅持地話要食焗豬扒飯⋯⋯ 喺屋企臨時臨急,用有限嘅材料難道會難得到本熊少爺整唔到俾佢食咩?既然佢要食,當然係要為佢做足一百分!整一個味道跟貼出邊快餐店嘅鮮茄焗豬扒飯,俾佢做晚餐!


就係因為煮呢個焗豬扒飯,搞到我成個禮拜哥哥上身一樣,不斷哼着啲舊歌,仲飲咗我好耐冇飲過嘅百事可樂添!揸車時,聽得最多嘅我相信就係呢一首〈貼身〉!搵返個 MV 諗住分享俾大家嘅時候,睇返個 MV 原來當時仲有而家 IT 個事頭婆「赤裸膏蟹」喺度做女主角!

#hogarhk #羆食堂 #肥熊人UMA

材料

主要材料:

豬扒~ 4 塊

鮮蕃茄~ 2 個

洋蔥~ 半個

燈籠椒~ 1 個

雞蛋~ 2 隻

生粉~ 10 克

調味/醬汁材料:

鹽~ 2 少許

茄膏~ 2湯匙

蕃茄醬~ 3 湯匙

罐頭碎蕃茄~ 一罐

糖~ 2 茶匙

鹽~ 1 茶匙

地瓜粉~ 4-5 茶匙

白胡椒粉~ ½ 茶匙

白醋~ 1湯匙

水~ 150 毫升

白飯~ 約 6 碗

車打芝士碎~ 3-4湯匙

究竟要點煮?

首先將豬扒拍鬆,用豬扒蒜粉、五香粉、香茅粉、麻油、酒、鹽調味,放入雪櫃醃一小時……煲好滾水,用刀將蕃茄底部鎅個「十」字,放入滾水內一至兩分鐘左右皮就會泛起,隔水攤凍再剝蕃茄皮……

起鑊落油炒香洋蔥、燈籠椒,將去皮蕃茄切成小粒及罐頭碎粒蕃茄放入去煮滾,然後收慢火開蓋煮,落蕃茄汁之後內再煮約 10 分鐘,落埋蕃茄膏、糖、鹽、白醋來調味。(為咗令到我屋企隻熊人仔食多啲蔬菜我將西蘭花莖切細粒放喺嗰汁裏便)……

準備炒飯。中火燒熱煎鑊落下油,打入 4 隻蛋,用鑊剷尖不斷快炒成細粒,放入飯拌勻並炒鬆成一粒粒,落少少鹽同胡椒調味。將飯放入焗爐耐熱玻璃兜。(為咗令到我屋企隻熊人仔食多啲蔬菜,我會將西蘭花莖切細粒放喺炒飯裏便)……

豬扒外面上地瓜粉,用氣炸鍋 180 度將豬扒底面各炸 8 分鐘,取出切件再放上飯面……

將蕃茄醬倒上豬扒上面,然後加上車打芝士碎……

焗爐放入整個豬扒飯,以 220 度焗 10 分鐘或直至芝士溶化。原盤上桌,熱辣辣的港式焗豬扒飯完成!


後記整蕃茄嘅餸想煮得似街外邊嘅味道,切記唔可以只係用新鮮蕃茄,一定要加茄汁同埋茄膏先至可以調出嗰個味道出嚟!而新鮮蕃茄粒亦都要切到有大有細,令到食嘅時候有口感同埋層次!


唔想錯過我哋嘅內容,記得贊好 hogar.hk Facebook 專頁youtube 頻道 !