Menu & Search
【味菜牛柳絲炒麵】 冇得出街飯聚唯有匿喺屋企自己食自己!

【味菜牛柳絲炒麵】 冇得出街飯聚唯有匿喺屋企自己食自己!

今個禮拜,無論網上定係身邊人,都不斷講話《古惑仔》漫畫完結,一個時代嘅終結!更有一啲不嬲冇買港漫嘅身邊人,話點都買本大結局支持下,但對於本熊少爺嚟講,呢本咁嘅垃圾根本完全唔值得我拎$25出嚟,買返屋企嘥地方。雖然呢本漫畫都係伴我成長⋯⋯當年本創刊號仲喺公司個書櫃,完整無缺擺咗喺度!


說實在,牛佬、邱瑞新、倫裕國三師徒,當年一齊開間浩一畫嘅江湖書真係好好睇!但自從牛佬同邱瑞新因財失義,反目成仇各自出書之後,呢本古惑仔嘅劇情真係每況愈下!說實在,牛佬諗嘅故事,不斷唔係打擂台就係千人對決,再唔係就係大堆頭,唔知為乜一打就打幾百期⋯⋯完全冇與時並進!

最令本熊少爺反感嘅係,呢本咁嘅書係香港呢場時代革命發生咁耐,本書封面就扮到自己有幾黃,但因為牛佬一早已經買咗版權俾啲大陸網站,就要不斷喺啲故事內容裏邊,穿插講緊示威者收錢出去搞事!我覺得你一係好似畫壇至尊『藍玉郎』,擺明車馬係藍嘅話我吹你唔漲!但係為咗搵錢藍底扮黃,仲要做得咁肉酸,要我拎錢出嚟買呢本書,我真係睬你都有味!

反觀佢徒弟邱瑞新本《火武耀揚》,雖然畫功好多時都真係強差人意,但係故事條大橋,同埋所有細節都與時並進,兩本江湖書一拍埋,即時立見高低!所以,咁多年嚟令本熊少爺個個禮拜,都真金白銀咁樣拎錢出嚟,一買就買咗成廿年佢徒弟本江湖書!

就好似好人會諗起江湖電影主題曲,大部份人都可能諗起〈友情歲月〉,不過本熊少爺就鍾意 廿四味 唱嘅《飛砂風中轉》主題曲〈人多勢眾〉

講咗咁耐牛佬,今個禮拜就聽住隻幾重江湖味嘅歌,整返碟材料都有牛肉嘅嘢食~味菜牛柳絲炒麵……

材料

主要材料:

牛柳絲~ 900g(用蠔油、糖、麻油、喼汁、生粉先醃 30 分鐘)

M&S 全蛋麵~ 一包

洋蔥~ 半個,切絲

青椒~ 半個,切絲

蒜頭~ 3 粒切片

清雞湯~ 250ml

究竟要點煮?

水滾就落麵餅,用筷子快速將麵餅揚散……

差不多揚散時就關火,開水喉水過冷河……

麵放在筲箕晾乾水,快速用豉油麻油撈勻個麵……

放入氣炸鍋,180 度 12 分鐘(6 分鐘停一停機,反一反個麵餅)……

之後煮味菜牛柳絲,先用白鑊炒乾味菜,拎起備用……

跟住落油爆香蒜片同洋蔥絲後,落青椒快炒……

再放牛柳炒至兩三成熟,炒勻後落清雞湯、汁料,滾起後就可以試味……

落生粉水埋芡,之後就可以淋上麵底即可。


後記呢個麵餅加豉油同埋麻油之後,炸起嚟味道其實真係幾似童星點心麵,不過老土啲都要再同大家講一次,每一個氣炸鍋火力有所出入,所以控制時間就要自己掌握!基本上個味菜牛柳絲炒出嚟,完全係冇難道,就算係我屋企嗰隻四歲大嘅熊人仔,而家佢都可以幫手炒得到!


唔想錯過我哋嘅內容,記得贊好 hogar.hk Facebook 專頁youtube 頻道 !