Menu & Search
【氣炸脆皮豬手】 冇得出街飯聚唯有匿喺屋企自己食自己!

【氣炸脆皮豬手】 冇得出街飯聚唯有匿喺屋企自己食自己!

今個禮拜,周邊所有人講得嘅最多,就係台灣嗰個都成 40 歲嘅貪玩小孩偶像劈腿分手,其實熊少爺覺得一啲都唔意外,試問一個男人,有錢又靚仔,生活又孤寂點會唔玩呀!偶像係唔使屙屎,只不過係一般星斗市民,一廂情願嘅諗法。


其實明星咪就係一個普通人,我親眼都見唔少螢幕前又有型又文質彬彬嘅,隨時平時真實嘅一面係柒到上宇宙嘅大有人在!說實在,所謂嘅藝人,感情事關我哋呢班星斗市民叉事咩?而家個社會本身都咁多問題,仲要去關心一對新手情侶誰是誰非,不如關心返啲切身嘅嘢好過啦!雖然係咁,但係今個禮拜都搞到我突然聽返十年前嘅呢隻歌!

既然提起豬,今個禮拜就一於飲住威士忌,同大家煮呢一隻炸豬手!

材料

主要材料:

急凍咸豬手~ 一隻

調味料

原粒白胡椒、白胡椒碎、香葉、白醋~ 適量

威士忌+清酒~ 一般大部分人都會用紹興酒,不過我就會改用威士忌加清酒

究竟要點煮?

首先,拎隻豬手完全解凍,洗淨之後拔豬毛……

煲一煲水,個煲水要浸得過隻豬手。凍水落原粒白胡椒(幾十粒)、酒、香葉幾片、白胡椒碎少量……

水滾落豬手,煲30分鐘,熄火後加半湯匙紹酒,蓋上煲蓋焗 20 分鐘,之後撈起豬手攤凍後,放雪櫃一晚抽乾啲水份……

用針插插豬皮,插嘅窿要多啲,再係豬皮上掃上一層白醋,之後等白醋吹乾……

預熱氣炸鍋 180 度 10 分鐘,跟著放隻豬手入去炸 180 度 30 分鐘。之後反轉另一面再炸 180 度 30 分鐘,之後微微等吹涼會脆口啲,就可以上碟。


後記由於每個牌子嘅氣炸鍋溫度都唔同,所以要自己觀察一下啲皮炸得香唔香脆。


唔想錯過我哋嘅內容,記得贊好 hogar.hk Facebook 專頁youtube 頻道 !