Menu & Search
【香草辣肉碎飯】  冇得出街飯聚唯有匿喺屋企自己食自己!

【香草辣肉碎飯】 冇得出街飯聚唯有匿喺屋企自己食自己!

多得呢個咁嘅政府咁嘅制度同埋咁嘅官員,佢哋作出所有決定,令本熊少爺有呢一個悠長假期,在家隔離盡量少接觸其他人。平時喺公司收工好多時都會走咗去九龍城搵泰國婆(我同主編好鍾意喺佢背後叫佢做登勢大嬸)食泰國菜!少咗出街食飯反而多咗時間令我喺屋企鑽研煮泰國菜!


今個禮拜完完全全俾 Tonick 隻〈衰喺個掣度〉成功洗咗腦!我個腦差不多廿四小時不停 loop 住呢首歌

一有時間出開九龍城,我就走去城南道嗰間泰國雜貨舖,向啲泰國店員偷師學煮泰國菜,佢哋又好好咁每次都有問必答,令到泰國菜新手嘅我,都好容易上到手,而家煮到一兩個泰國餸都呃到下人!今日我就同大家分享一下,呢一個泰式碟頭飯 打拋肉碎飯( 香草辣肉碎飯 ข้าว กระเพราหมู)!

材料

主要材料:

免治豬肉~ 500 克

豆角~ 150 克,切粒

蒜蓉~ 約 2-3 湯匙

紅蔥頭~ 一個切絲

指天椒~ 1-2隻(隨意)

鳥眼辣椒~ 1-2隻(隨意)

打拋葉~ 約40片

雞蛋~ 1隻

調味料

魚露~ 1湯匙

生抽(醬油)~ 1茶匙

老抽(黑醬油)~ 2茶匙

蠔油~ 2茶匙

糖~ 2 茶匙

青檸汁~ 少許

究竟要點煮?

預熱,燒紅隻鑊後落油、蒜蓉、紅蔥頭、指天椒、鳥眼辣椒等材料炒香……

落免治豬肉、豆角,同所有調味料拌匀,炒大約 4-5 分鐘。炒熟豬肉再加調味料之後,最好先試試味,太鹹可加糖,太淡可再加魚露……

熄火加入打拋葉拌匀,加幾滴青檸汁就可上碟。切記,打拋葉唔可以炒,否則受熱太耐會變啡色,影響賣相和味道……

最後,落油以中火加熱至出煙,再落蛋煎成太陽蛋。其實如果煎鍋夠熱就可以熄火,用餘熱去煎就唔會過熟(正宗泰式做法,是用大量油炸成太陽蛋),再放在飯面就可以上碟。


後記因為要煮埋俾熊人仔食嘅關係,所以啱啱呢一次煮我係冇加到辣椒,如果各位怕辣,其實可以將指天椒去核,或者用唔辣嘅大椒代替。另外,如果唔食豬肉嘅朋友,都可以用雞肉或者新豬肉代替!

其實呢個餸,仲可以攞嚟同白飯撈埋一齊炒,變成炒飯個味道更加好食,大家不妨可以試下,呢個香草辣椒肉碎炒飯,絕對係本熊少爺嘅飛佛!


唔想錯過我哋嘅內容,記得贊好 hogar.hk Facebook 專頁youtube 頻道 !