Menu & Search
【陳皮火鴨羹】  冇得出街飯聚唯有匿喺屋企自己食自己!

【陳皮火鴨羹】 冇得出街飯聚唯有匿喺屋企自己食自己!

今個禮拜,本熊少爺猶如一隻隱蔽中年一樣!全日係屋企沉迷於虛擬空間之內!日日喺度釣魚、斬樹、整傢俬!玩到連自己都覺得自己幾毒下!復活節長假期,熊人仔有朋友仔全家過嚟探佢,本熊少爺點都要煮下飯招呼下朋友!


左諗右諗,突然間靈光一閃,諗返以前好鍾意食嘅一個老派菜!所以一路開着電視聽許冠傑嘅舊歌,一路煮我呢一餐晚餐!搞到我呢幾日都不斷哼住歌神其中一隻歌!

喺招呼朋友時,我發現原來好多人,都真係未聽過以前啲舊式酒樓,除咗西湖牛肉羹之外,係仲有一個 港式老菜 叫做 陳皮火鴨羹!莫非我真係生活喺上一個世紀嘅一隻熊?既然係咁我分享一下個煮法,大家喺屋企都可以當係一種新嘅菜式,嚟品嚐一下!

【陳皮火鴨羹】材料(4人份)

主要材料:

燒鴨~ 四分一隻起肉切絲

陳皮~ 一塊浸透切絲

冬筍~ 一個滾熟切絲

花菇~ 三隻浸透切絲

韭黃~ 兩両切段

上湯~ 一公升

粟粉~ 一湯匙

紹酒~ 一湯匙

老抽~ 一茶匙

究竟要點煮?

花生油起鑊爆香薑絲……

鴨絲、筍絲、花菇絲落鑊猛火炒透……

加入上湯滾四分鐘……

加紹酒、粟粉同老抽一茶匙調色……

放埋韭黃,即可上菜


後記呢個羹絕對係功夫菜式!雖然煮嘅時間唔耐,但係煮之前企喺廚房,一定要好俾心機,慢慢地將所有嘅材料起肉再切到一條條幼絲!絕對係考驗耐性嘅時間!

若然屋企有急凍魚肚或者花膠,可以切絲放埋落去,個湯嘅口感會更加好!啱啱我屋企個雪櫃,就係之前打邊爐食咗之後冇補貨,令成個火鴨羹失色不少!


唔想錯過我哋嘅內容,記得贊好 hogar.hk Facebook 專頁youtube 頻道 !