Menu & Search
【自宅乾炒牛河】 冇得出街飯聚唯有匿喺屋企自己食自己!

【自宅乾炒牛河】 冇得出街飯聚唯有匿喺屋企自己食自己!

啱啱過去個星期,趴街政府突然間刊憲,話星期五黃昏六點起要全港酒吧停業14日,本熊少爺喺呢個 Happy Friday 六點前,當然要好好享受埋最美好時光,之後就諗住戒酒14日!正當我喺又一城 Dan Ryan's 個吧頭享用緊我杯番鬼佬涼茶時,好友們都紛紛 WhatsApp 我一個好震撼嘅消息!細So俾商台炒咗!


我認識呢一個純情小 DJ,數數手指都真係已經有廿年歷史!可能連當事人都已經忘記咗,但係本熊少爺好記得,當年喺壽臣劇院舞台劇綵排嘅時候,有人貪玩扮死屍結果俾人屌⋯⋯ 大家嘅關係以前真係純粹係 DJ 與聽眾嘅關係,但到咗近年,因為大家有共同朋友,開始做到朋友有時出嚟食下飯。有一件事一直我好感激呢位唔算好熟嘅朋友,喺熊人仔仲係 BB 仔嘅時候,佢十分抗拒我呢個老竇,多得蘇耀宗先生教識我,點樣同熊人仔相處⋯⋯ 可以令屋企兩隻熊融融洽洽咁生活到!

一諗到以後打開收音機都唔知聽乜嘢嘅時候,就諗起其實由《好回家》年代開始,到而家嘅《生活日常》,每個黃昏揸緊車或者係喺公司開住收音機,聽住呢位純情小 DJ 都會播放住好多好多 Jamiroquai、Beatles、Bob Marley、John Legned、Coldplay、Jack Johnson、Ed Sheeran等等等等名曲,喺大氣電波聽住佢把聲,已經成為每日嘅生活習慣!連熊人仔當時仲係啱啱學識講嘢嘅時候,都識同佢媽咪用純正嘅BB話,講出生活日常句開出對白:「蟲草⋯⋯來日方長生活日常!」(仲做?來日方長生活日常!)

好彩 Jerald 喺星期五當晚即刻喺 YouTube upload 咗〈My Daily Life〉 (《生活日常》主題曲)可以㩒入去懷念一下!

第二朝,星期六朝早冇得聽《好醒晨》,成隻熊好似若有所失咁。今日悶悶地又唔知煮咩嘢食,兼又唔係好想食飯,既然上星期整過咕嚕肉,今個星期一於同大家研究一下簡單喺屋企炒一個乾炒牛河!

【乾炒牛河】材料(4人份)

主要材料:

牛霖肉~ 400g

河粉~ 1200g

銀芽~ 60g

蔥~ 2 條(切段約兩吋)

韭黃~ 1 扎(切段約兩吋)

洋蔥~ 半個(切片)

生抽~ 3 湯匙

老抽~ 3 湯匙

牛肉醃料:

清酒~ 2 湯匙

生抽~ 1 湯匙

老抽~ 2 湯匙

喼汁~ 少許

糖~ 1 茶匙

鹽~ 1 茶匙

豆粉~ 1 茶匙

黑椒~ 少許

麻油~ 1/2 茶匙

水~ 1 茶匙

要點煮?

將牛肉橫紋切薄片, 用醃料醃牛肉 30 分鐘。蔥同韭黃切段,洋蔥切絲備用。另外,新鮮的河粉買返嚟千祈唔好洗同埋出水,直接落鑊就可以……

燒紅隻鑊落油,先快炒牛肉至半生熟,然後拎起備用……

用返本身隻鑊落少少油,先炒洋蔥、韭黃至軟身,然後下銀芽快炒……

落河粉生抽、老抽,摩打手不停炒散,令每一條河粉平均沾上豉油……

最後下牛肉及蔥段拌勻,再試試味,兜勻上碟……


後記|喺屋企整乾炒牛河,想炒到乾身少油又要唔黐底,坊間好多人都會覺得有啲難度!但係 759 嗰隻韓國鑊真係好幫到手(最緊要係平,百零蚊貨仔媲美好多貴價貨)!就算用少少油都唔會容易黐底!成個乾炒牛河即刻感覺上變得健康咗!

另外,大家切記切記,炒乾炒牛河千祈唔好用鑊鏟嚟炒!因為如果用鑊鏟嘅話,好容易令到啲河粉支離破碎,最好用筷子嚟炒,可以將啲河粉每一條都沾滿到豉油嘅色香味!


唔想錯過我哋嘅內容,記得贊好 hogar.hk Facebook 專頁youtube 頻道 !