Menu & Search
【有啲不倫不類】 十八味私房牛肉麵

【有啲不倫不類】 十八味私房牛肉麵

今日同好友趷趷剛出去見完客,之後搵個地方坐喺度傾一傾見客啲嘢,近近地我哋就走咗去 紅磡 嘉里酒店,懶型咁望住維港睇住日落飲返杯!傾完嘢天都黑晒,冇理由仲留喺酒店嗰度食酒店嗰啲嘢㗎!(真心覺得嗰度啲嘢食冇乜選擇又唔多好食)


趷趷剛提議話走去食菲律賓姐姐飯堂 Jollibee,但係我覺得太熱氣要求求其食碗麵就返屋企!我哋第一時間諗起,紅磡 有間都幾好味嘅蘭州牛肉拉麵!點知去到,個名都唔同晒⋯⋯不過飲咗酒,我又唔想再周圍搵地方,求求其其食完返屋企好過,所以就走咗入去幫襯一間叫 十八味私房牛肉麵!

麻辣紅燒牛肉麵~

基本上個麵送到嚟嘅時候,個樣完全係唔討好!但係食落去個味道,確實又唔差!其實間鋪頭好奇怪,基本上我都拿捏唔到佢係屬於一間乜嘢國籍嘅餐廳!感覺上似台灣牛肉麵,其實佢個麵某程度上,又好食過早兩日我喺尖沙咀鐵牛食嗰碗牛肉麵!麻辣醬嗰陣味道似曾相識,偏向四川風味辣得嚟又有陣陣麻香,食落極之似喺大陸食緊嗰啲嘅麻辣味道!


後記|諗返起以前呢個位,嗰間蘭州拉麵真係好好味㗎,點知最後都做唔住。整體嚟講呢間舖頭,由裝修到餐牌俾我感覺都有點不倫不類,古古怪怪,就連碗麵送到嚟,側邊有啲中華沙律加個桔,令我完全覺得自己返咗大陸食麵一樣!不過個麵嘅味道真係唔差,喺黃埔求求其其搵間鋪頭食碗麵,呢度可以傳去個選擇!


十八味私房牛肉麵|紅磡明安街5號地舖

唔想錯過我哋嘅內容,記得贊好 hogar.hkFacebook 專頁youtube 頻道 !