Menu & Search
【尖咀抵食牛扒】 Nomads

【尖咀抵食牛扒】 Nomads

今個禮拜,本熊少爺香港九龍新界四圍遊走見客傾嘢,睇吓過完年有乜嘢攪!前日喺我要過去銅鑼灣剪頭髮之前,尖沙咀 嗰個客打比我話傾兩句,要帶我去食一間「佢話」好抵食嘅地方!行到去金巴利道,點知原來佢係帶我嚟食 Nomads。


其實呢間鋪,我以前成日同我其中一個老朋友鹹濕小燊嚟食!以往我嚟食,會食百零蚊嘅自助午餐,貪佢呢度啲即製 Pizza 幾好味!我都以為個客係同我食 Pizza 同意粉,點知今日佢帶我嚟食呢度嘅 Set lunch!

石燒紐西蘭肉眼扒配蘑菇燒烤汁~

肉眼扒鬆軟有淡淡嘅肉香,牛扒喺廚房時,廚師只係隨意煎過兩邊,就放上件厚厚嘅雲石度拎出嚟。不得不讚係佢件雲石真係燒到好熟,就算期間我慢條斯理同個客傾緊計,未有即刻食件扒,但竟然食到尾嘅時候,件雲石仲係好高溫!
其實坊間有好多石燒牛扒,食到一半時塊石已經涼浸浸凍冰冰!對上一次令我驚為天人,食到尾仲係熱辣辣嘅岩石牛扒,已經係同主編去福岡嘅時候,食過嘅免治牛扒!


後記|幾廿蚊有湯有salad bar,喺尖沙咀真係食茶餐廳都未必得!午飯時間仲要只係得我哋一枱,包場食晏晝,最緊要仲要唔難食,真係一個唔錯嘅選擇!


Nomads|尖沙咀金巴利道 53-59 號地下 A 室

唔想錯過我哋嘅內容,記得贊好 hogar.hkFacebook 專頁youtube 頻道 !