Menu & Search
【入大澳食沙翁】 華記香脆雞蛋仔、金門餅店

【入大澳食沙翁】 華記香脆雞蛋仔、金門餅店

眼見熊人仔由農曆新年假開始停課,到而家日日留喺屋企自我隔離,真係遲早屈到病!所以見今個禮拜平日有日得閒,一家三口搭船入去 大澳 行下食下嘢,吸收下陽光同新鮮空氣!最後,食咗底 華記雞蛋仔,同埋喺 金門餅店 買咗沙翁食。


炭燒雞蛋仔~

見到有間 華記香脆雞蛋仔,排隊嘅時候,眼見賣雞蛋仔伯伯好俾心機,每次只係整一底雞蛋仔,平均都要大約 4 分鐘!所以等嘅時間會比較長!在滿心歡喜極度期待底下,卒之拎到製成品上手,先唔講味道,我一心諗住係脆卜卜新鮮出爐嘅嘅蛋仔,竟然好淋,明明以前仲係推緊木頭車嘅雞蛋仔唔係咁樣㗎!一入口真係十萬個失望,腦海突然間出現咗小方嘅其中一句歌詞:「期望你太多注定難過,只好怪為食令我闖禍!」

山長水遠,長途跋涉入嚟食咗底 $23 既冇蛋味又唔香脆嘅雞蛋仔,真心我寧願得閒夜晚,揸架車落去南山村食十元八塊一底雞蛋仔,再加個夾餅好過!之後行行下,又比一道香味吸引著……

沙翁~

喺極度失望嘅時候,還好經過 金門餅店 有返啲驚喜!個 沙翁 新鮮即炸,炸到熱辣辣金黃香脆,再加上砂糖,甜度剛好仲有脆脆的口感。食落充滿蛋香,外脆內軟!$13 一個完全覺得之前食嘅雞蛋仔係冇得比!


後記|好多年都冇入過大澳,唔知點解今次入去硬係好似同以前入去有啲唔同,裏便啲檔口嘢食,真係唔算好食得嚟仲要唔抵食,尤其是 $12 兩粒嗰啲大大粒魚蛋!究竟而家啲人入大澳,多數會食啲咩㗎呢?大家不如留言研究下~


華記香脆雞蛋仔|大澳石仔埗街121號地下

金門餅店|大澳吉慶街66號

唔想錯過我哋嘅內容,記得贊好 hogar.hkFacebook 專頁youtube 頻道 !