Menu & Search
【 自轉串燒 】 密密燒

【 自轉串燒 】 密密燒

啱啱過咗嘅農曆新年,係本熊少爺覺得近年最冇氣氛嘅一個新年,事緣中國爆發武漢肺炎,加上有一個完全完全唔理香港人死活嘅女人,唔肯封關令到大量確診嘅內地人,不斷擁入嚟醫病,搞到全港嚴重爆發,仲開始在社區人傳人搞到人人自危!


每日啲人淨係掛住搶口罩、搶消毒用品,跟住再進一步搶米、搶麵、搶廁紙、搶 M 巾!最心噏見到啲老人家要走去排幾個鐘頭隊,去為咗買幾個口罩⋯⋯究竟香港人做錯啲乜?

今年開年飯都冇興趣大搞,主編好友、趷趷剛同我三個,求求期期喺 長沙灣 搵咗間叫 密密燒 嘅 $238 任飲任食串燒,完全冇期待過佢會好食,志在搵間舖頭飲下啤酒吹下水就算,但又係竟然有驚喜。

店員奉上一盤盤食物嚟嘅時候,竟然係一串串未腌食物!店員話最主要係想食返食物嘅原味。枱頭會提供辣椒粉、孜然粉同埋鹽,嚟比客人因應自己嘅喜好作出調味!雖然絕對稱唔上鮮味,但係兩個幾鐘頭坐喺度慢慢食,飲下啤酒又真係唔難食!

估唔到雪櫃嘅嘢飲都尚算齊全,有齊可口可樂、雪碧、芬達、重有道地唔同味道嘅茶類飲品任君選擇(我竟然原來冇影到個雪櫃),至於任飲啤酒,係一隻不知名嘅扮日本麥啤,但係寫明係泰國製造嘅啤酒!我哋三個有諗過,如果任飲嘅啤酒難飲嘅話,我哋會即刻俾錢轉生啤(冇記錯好似係$48一杯),好彩飲落嗰個味道,根本就係泰國象啤嘅味道,飲落唔難飲,所以唔轉到生啤直接飲任嗰隻飲啤酒!

後記:說實在,而家求其搵間酒吧坐低飲下啤酒,埋單都可能每人要平均三舊水一個人,呢度呢個價錢,可以飲飽食醉確實又真係性價比高!確實係三五知己吹水幾好嘅選擇!

密密燒| 深水埗東京街50號地舖

唔想錯過我哋嘅內容,記得贊好 hogar.hkFacebook 專頁youtube 頻道 !