Menu & Search
【 招牌涼皮 】兩姊妹涼皮有限公司

【 招牌涼皮 】兩姊妹涼皮有限公司

最近啲天氣都唔知乜嘢事,明明都過咗中秋但係竟然都突然間又變返三十幾度!每日出街都係咁流汗,搞到濕透了衣裳⋯⋯本熊少爺真係冇乜事都唔想走出街!就算出咗街都冇乜胃口食得落嘢。早兩日迫於無奈因為有嘢要做走咗去 太子 嗰頭,過咗午飯時候都冇乜胃口。諗住搭的士返公司攤唞下嘅時候,喺十字路口望過對面馬路,見到一間冇乜裝修個招牌淨係幾隻紅色字嘅小店,吸引咗我行過去望望。天時暑熱見到呢間鋪頭話買涼皮,橫掂肚空空未食晏晝,本熊少爺膽粗粗就走咗入去 兩姊妹涼皮有限公司 試下⋯⋯


招牌兩姊妹涼皮+滷水溏心蛋、滷水肥腸~

滷水蛋完全唔入味亦做唔到溏心嘅效果⋯⋯失敗!肥腸滷得夠味配落麻辣嘅涼皮都好夾!佢嘅主角招牌涼皮,麻香辣完全配合得天衣無縫!芫荽嘅比例亦唔係得嗰少少⋯⋯作為一個芫荽控,值得本熊少爺加多少少分俾佢。不過下次本少爺再去幫襯嘅話,可能會淨係涼皮再叫小食。因為本身個涼皮其實唔使加餸落去已經好好食。

後記:極不起眼嘅一間冇裝修小店,撇除極唔環保用發泡膠碗裝食物之外,整體來講佢嘅麻辣涼皮真係幾好味!另外需要提一提呢度係立食店,深信呢度嘅宗旨都係嘢食嗱嗱聲送上,食客嗱嗱聲食完走人,方便做多一點生意!本熊少爺真心覺得呢度啲嘢食,適合立食多過擺啲凳喺度俾人慢慢食!有時候唔同嘅食物需要唔同嘅裝修同埋擺位!


兩姊妹涼皮有限公司|太子柏樹街15號地舖

唔想錯過我哋嘅內容,記得贊好 hogar.hk Facebook 專頁 youtube 頻道