Menu & Search
【 招牌養心麵 】 養心麵

【 招牌養心麵 】 養心麵

好友趷趷剛一直都研究緊今年我哋要衝出香港,拓展業務去東南亞地區,一直十劃都未有一撇,但係嚟到今個禮拜有發展,當地同我地接洽嗰便嘅合夥人,突然間叫我地兩個一齊出發走去當地開會!走得太突然嘅話,香港嘅嘢都要留低個人處理,趷趷剛臨上機之前一晚捉咗我出去尖沙咀,飲杯嘢順便交低呢個禮拜有啲乜嘢我走去處理。但係個衰仔竟然自己喺公司附近食完「鱻」先出嚟尖沙咀,我肚空空喺 尖沙咀,冇理由唔自己食返啲嘢先至同佢傾。求求其其走咗入去呢間 養心麵 速食碗麵,先走去同個衰仔飲燒酎傾公事!


【 招牌養心麵 】 養心麵 | 尖沙咀 | 《羆食堂》

招牌養心麵+台南蚵仔、台灣炸豆皮~

本身呢個麵裡面,已經有咗麻辣鴨血、台灣滷豬腳、台灣滷水糖心蛋、台灣水蓮、台灣貢丸呢五樣餸,但係既然叫得做車仔麵,本熊少爺梗係要叫多一兩個餸先至安樂喇!整體上豬手炆到入晒味,鴨血都好好味,香港坊間少見嘅水蓮,食落去口感似韭菜蒜芯嗰種感覺,麵底可選擇配上新竹米粉亦都抵讚!蚵仔尚算新鮮亦煮得唔過火,額外叫嘅炸豆皮其實真係可有可無!

後記:呢間養心麵,根本就係平時本熊少爺都有幫襯過嗰間養心殿台式養生鍋嘅分線!基本上佢嘅車仔麵選擇唔多,味道雖然還好但係感覺上好似將公司啲火鍋配料拎過嚟做車仔麵配料一樣。求其一個招牌面加多兩個餸埋單已經要一舊水,本熊少爺就真係覺得坊間有更加多好嘅選擇,好食過呢一間麵舖!


養心麵|
尖沙咀金馬倫道29A號地下

唔想錯過我哋嘅內容,記得贊好 hogar.hk Facebook 專頁 youtube 頻道