Menu & Search
【 老壇子酸菜魚 】 深圳 太二

【 老壇子酸菜魚 】 深圳 太二

啱啱過去嗰個星期六,一朝早帶住熊人仔同賢內助跟住外母,返咗去佢鄉下 沙井 探賢內助個婆婆食個晏晝飯,兼且慶祝母親節,食飽飯返咗去婆婆屋企,啲長輩打麻雀嘅打麻雀、打機嘅打機⋯⋯就連熊人仔都喺佢姨婆間房部電視,搵到佢平時最愛睇嘅《Paw Patrol》,完全無視咗我兩公婆。咁啱我位賢內助最近成日提起想上 深圳 食酸菜魚,既然咁好機會,即刻叫佢舅父揸車,車我地兩公婆去拍下拖食返餐酸菜魚!


【 老壇子酸菜魚 】 深圳 太二 | 深圳 | 《羆食堂》

老壇子酸菜魚(鱸魚2人份)~

炒香咗酸菜,再加入豬骨及雞熬成嘅湯,再煮配料。鱸魚起肉起骨分開煮,之後爆香辣椒、蒜頭同香料,灒上滾油同菊花瓣!網上教路先飲啖湯,再食酸菜同魚!湯底冇得揀辣度得一種,味道偏辣,而且微酸開胃唔太油。魚肉片得薄身嫩滑有魚味完全冇魚腥味,啖啖肉完全無骨啱晒唔識吐骨嘅可我!配料配上紅薯粉同脆豆腐都十分匹配!不過呢度個湯配白飯加少少酸菜變成酸菜泡飯真係好食過酸菜魚!難怪鋪頭都寫明酸菜比與魚好味!

烏梅山楂飲、熊貓眼蜂蜜艾爾啤酒~

烏梅山楂飮酸酸甜甜,解辣一流,值得一試。但係佢呢度嗰個蜂蜜手工啤,本熊少爺覺得不試也罷!基本上係有少少怪味嘅青島!


後記:聞說呢間鋪頭喺深圳,隨時要排幾個鐘先有得食,慶幸當日我地過咗午市時間,唔需要排隊即刻有得食。不得不提呢度有一種免費自助嘢飲,係用陳皮同洛神花調配嘅熱飲,味道絕對似細個食嗰啲佳寶九製陳皮開水,飲落都幾得,飲下無妨。

不得不提佢呢度有飯後甜品可以叫嚟食,兩種冰粉個名都幾得意添,叫做「前任」同「現任」⋯⋯我位賢內助大人仲話網上啲人講,前任好食過現任,叫我試下添!本熊少爺未睇到個餐牌嘅時候,我 R 晒頭都唔知佢講乜嘢,睇完即刻得啖笑!但係真係食得太飽叫唔到嚟食,我諗下次再上去我都會試下個前任!


太二 (深圳)|
深圳沙井路 168 號京基百納廣場六樓 608 號鋪

唔想錯過我哋嘅內容,記得贊好 hogar.hk Facebook 專頁 youtube 頻道