Menu & Search
【 雞蛋焗魚腸 】 軍記海鮮菜館

【 雞蛋焗魚腸 】 軍記海鮮菜館

今個禮拜難得差不多約得齊腳一大班本熊少爺結婚嘅時候兄弟走咗出嚟!雖然美中不足其中有一個娶咗公主癌老婆嘅兄弟畏妻唔敢出嚟,但亦都無阻我哋風花雪月談笑風生!一班好兄弟坐低有乜地方好去,梗係去大排檔飲下啤酒傾吓計係最開心嘅,最後去咗 佐敦 嗰間 軍記 !


【 雞蛋焗魚腸 】 軍記 海鮮菜館 | 佐敦 | 《羆食堂》

椒鹽白飯魚~

唔知由幾時開始,我真係好鍾意去大排檔叫椒鹽白飯魚嚟食!呢個亦成為趷趷剛同我出街佢最大嘅禁忌,唔會俾我叫嘅一樣嘢食!而家啲白飯魚同細個食嘢好有出入,真係越食越大條好似中咗輻射咁!但係亦都冇阻礙我對佢嘅喜愛用嚟送酒一流!

炒四季豆~

炒四季豆都總算係最佳送酒嘅蔬菜,鹹鹹地嘅豆豉蒜蓉肉碎炒出嚟夠乾身好味!

雞蛋焗魚腸~

去到軍記,每一次我一定會點嘅一個餸,一定係呢個雞蛋焗魚腸!佢啲魚腸冇腥味亦冇苦味,作為一隻怕魚腥味嘅熊少爺,都對呢一個外脆內嫩嘅小菜愛不釋手,絕對唔簡單!

鹹菜豬肚煲~

成餐飯最敗筆嘅一個餸!水嗲嗲又冇乜味道,急凍豬肚完全唔入味!

蝦醬蒸腩肉~

我有理由相信成班約埋去飲嘢,真係會亂咁叫嘢食!呢個餸雖然係好好味,但係餸酒就硬係奇奇怪怪!呢一  個餸根本就應該攞嚟送飯食,但係飲酒我又唔會食飯⋯⋯所以呢一餐,白白浪費咗呢一個咁好味嘅餸!

豆豉鯪魚炒油麥菜~

油麥菜大有豆豉鯪魚嘅鹹香,鹹鹹地送啤酒完全冇問題,但係同蒸腩肉都有同一個問題,呢個餸比較適合食飯囉!

後記:食飽飯酒過三巡,我哋再轉場去相熟酒吧繼續飲酒,飲住香檳分析及鬧醒其中一位兄弟啲感情問題!其實兄弟大家各自有咗家庭之後都真係聚少離多,好珍惜每一次大家出嚟嘅機會,往往飲到唔捨得返屋企。真係要好好珍惜細個時玩大嘅友誼!

後記:食飽飯酒過三巡,我哋再轉場去相熟酒吧繼續飲酒,飲住香檳分析及鬧醒其中一位兄弟啲感情問題!其實兄弟大家各自有咗家庭之後都真係聚少離多,好珍惜每一次大家出嚟嘅機會,往往飲到唔捨得返屋企。真係要好好珍惜細個時玩大嘅友誼!


軍記海鮮菜館|

佐敦白加士街1A地下

唔想錯過我哋嘅內容,記得贊好 hogar.hk Facebook 專頁 youtube 頻道