Menu & Search
【咖哩牛坑腩伊麵】 洪強原味清湯腩咖喱專門店

【咖哩牛坑腩伊麵】 洪強原味清湯腩咖喱專門店

復活節長假期,本熊少爺一家約埋熊人仔啲朋友,走咗去黃金海岸酒店,近近地度個假。狂歡之後,一心諗住近近地走去 屯門 ,食之前介紹過嘅小鍋米線先返屋企。點知過到去,發現屯門嗰間小鍋米線已經執咗,但係已經到咗熊人仔同佢個女仔朋友午飯時間之後瞓晏覺!我哋唯有急急腳,喺附近求其走入一間鋪頭,諗住餵飽佢兩個小朋友,跟住速速返屋企比佢哋瞓晏覺!點知誤打誤撞搵到一間叫「洪強原味清湯腩咖喱專門店」,原來有驚喜!


【 咖哩牛坑腩伊麵 】 洪強原味清湯腩咖喱專門店 | 屯門 | 《羆食堂》

咖哩牛坑腩伊麵~

咖喱膽內有大量洋蔥同埋香料,配上伊麵異常咁好味!坑腩肥瘦適中有牛味!

清湯牛筋河~

賢內助叫咗個牛筋河嚟食,我食咗佢幾啖⋯⋯牛筋炆得夠淋,但可能炆得入味得滯牛筋都幾鹹添!

咖喱牛坑腩飯~

熊人仔個女仔朋友個爸爸,因為要 Keep 住自己完美嘅身形,雖然叫咗碟咖喱牛腩飯,但係佢都要控制自己食量。我當然唔會錯失呢一個幫佢食咁啲,又可以試味嘅機會啦!基本上佢呢度個咖喱配上白飯更加好味!搞到本熊少爺應該都會閑時冇嘢做,揸架車走入去再幫襯!

後記:而家去食過嘅鋪頭真係好多時眨吓眼就會消失咗!難食嗰啲自動流失我完全唔會介意,但係就算係好食嘅有心機做嘅舖頭,都隨時因為種種唔同嘅原因,極速消失真係好令人洩氣!有時如果食到啲好味嘅小店,真係要及時行樂,有得食就食多幾次,啲舖頭真係唔知幾時隨時會突然間話消失就消失!


洪強原味清湯腩咖喱專門店 |

屯門青葵徑5號地舖

唔想錯過我哋嘅內容,記得贊好 hogar.hk Facebook 專頁 youtube 頻道