Menu & Search
【 豬扒麵 】 興發麵家

【 豬扒麵 】 興發麵家

忙碌咗成個幾月今個禮拜終於完工!趷趷剛個衰仔喺交貨日開始連續發燒發咗幾日!完全冇見過個衰仔,喺佢開始發燒之前我最後一次見到佢,就係帶我嚟 長沙灣 興發麵家 呢間小店食咗個下午茶!趷趷剛先生已經多次同我強烈推介,呢度個炸豬扒上海麵叫我嚟試下。


【 豬扒麵 】 興發麵家 | 長沙灣 | 《羆食堂》

淨水餃拼雲吞~

雲吞同埋水餃,都喺事頭婆坐喺麵檔側邊枱仔,用純熟嘅手勢默默咁包出嚟,整體來講都不算太特別,中規中矩正常嘢。不過見到事頭婆新鮮手工即包即煮,都值得加分嘅。

豬扒麵~

唔知點解近年好多麵檔,都會用呢一隻帶有淡淡黃色嘅上海麵來做湯麵,但係我印象記憶中,呢一種上海麵其實係用嚟炒上海粗炒用嘅,可能呢一隻麵現成交貨嚟方便,唔需要再出水,所以一般麵檔都鍾意用嚟直接放湯煮麵,但係本熊少爺真係歡喜啲白雪雪起晒角嘅上海粗麵多一啲。至於個薄炸豬扒真係抵讚!老闆喺麵檔煮麵嘅時候,事頭婆即刻放低佢包緊嘅水餃雲吞,跑去店後便廚房即刻開油鍋新鮮炸出嚟!豬扒已經揼到薄薄咁,入口唔韌,腌料方面亦只係簡單用鹽同胡椒腌過啲豬扒,但食落味道相當唔錯。

後記:每次去幫襯類似呢啲舊區,由老夫老妻默默耕耘營運嘅小店,都覺得一有一種好濃烈人情味嘅感覺,某程度上嚟到呢啲小店真係食呢份人情味!


興發麵家 |

長沙灣保安道337號地下

唔想錯過我哋嘅內容,記得贊好 hogar.hk Facebook 專頁 youtube 頻道