Menu & Search
【 咖喱牛腩配豬仔包 】 澳門 氹仔林記燒烤

【 咖喱牛腩配豬仔包 】 澳門 氹仔林記燒烤

平時星期六、日都會係本熊少爺嘅家庭日!我極少會放低我位賢內助同埋熊人仔喺屋企,自己走咗出去仲要唔返屋企!事緣啱啱過去嘅星期日要去 澳門 傾啲嘢見見客,其實都有諗過帶埋佢哋兩個過去,但一諗到帶住熊人仔舟車勞頓,又坐車又坐船即刻打消呢個念頭⋯⋯最後自己出發做嘢,順便過 氹仔 林記燒烤 食下嘢!


【 葡式凍蝦 】 澳門氹仔林記燒烤 | 澳門 黑沙環 | 《羆食堂》

葡式凍蝦~

每次過到嚟梳打埠,必定會走來幫襯呢度個葡式凍蝦!令我念念不忘並唔係啲凍蝦,我歡喜嘅係凍蝦下面嘅生洋蔥!有返咁上下年紀嘅人,應該都記得當年安西教練嚟香港賣炸雞,套餐其實有一個沙律,呢度嗰個洋蔥唔知點解俾我感覺上,好似 KFC 當年嘅嗰一個沙律。

烤牛脷~

係我埋單嘅時候,先至醒起我竟然冇叫到烤羊架,但係我都有叫到呢個時烤牛脷!呢度嘅烤鹹牛脷叫嚟送酒都幾絕配!

葡式薯絲炒馬介休~

其實我真係比較歡喜食炸馬介休球,多於其他烹煮方法嘅馬介休!呢一個薯絲炒馬介休入口感覺比較濕,所以食咗幾啖我都放棄咗!

咖喱牛腩配豬仔包~

咖喱香濃好味牛腩亦炆得夠腍,喺澳門食豬仔包亦唔會錯得去邊度!不過呢度個咖喱都真係幾辣,唔食得辣嘅朋友仔,真係要同店員講清楚唔好煮咁辣!

葡汁焗時蔬~

一班人叫嘢食最緊要係默契!其實有乜理由叫完咖喱牛腩,又會走去叫多個葡汁焗時蔬㗎?咁樣咪撞到嘭嘭聲囉!但係嚟到澳門,又當然要食佢哋個葡汁,葡汁比起咖喱來得溫馴唔嗆喉!略嫌啲蔬菜煮得比較硬身!


後記:泊低架車喺東涌坐的士去港珠澳大橋,坐金巴過澳門其實真係幾快!以後過馬交見客都唔需要又轉車又坐船,絕對可以帶埋我屋企兩位寶貝甜心,喺酒店等我做完嘢再同佢哋吃喝玩樂!


澳門氹仔林記燒烤|
黑沙環黑沙環新街252-358號海濱花園第8座地下

唔想錯過我哋嘅內容,記得贊好 hogar.hk Facebook 專頁 youtube 頻道