Menu & Search
【 豉油皇雞腸 】 煊記 火鍋小菜館

【 豉油皇雞腸 】 煊記 火鍋小菜館

最近工作關係,日日都喺油麻地區日夜打躉,基本上我嘅人生,佔咗大部份時間都係喺登打士街附近徘徊!細個老竇喺度返工,成日走去砵蘭街啲機舖直接用鎖匙開局打機,到大個啲十九幾年前就日日走去啲咖啡室飲咖啡 hea 時間!早兩日我同好友趷趷剛諗住去食晚餐,個衰仔叫我去食老川王但係我又唔係好想食辣嘢,我即時諗返起 煊記 可以帶佢去食下!


【 豉油皇雞腸 】 煊記 火鍋小菜館 | 油麻地 | 《羆食堂》


豉油皇雞腸~

坊間多數嘅舖頭,如果食到禽畜類嘅腸,大多數只會係嗰啲啤晒水嘅急凍鵝腸,本熊少爺經常走去啲鋪頭叫豉油王鵝腸,唔知點解永遠永遠永遠,都係三色燈籠椒同洋蔥嘅比例,比鵝腸多出兩倍以上!但係呢度竟然係用新鮮雞腸嚟整呢個豉油王雞腸,仲要唔係幾條寥寥可數嘅份量!基本上成碟都剩係得沾滿咗豉油王嘅雞腸!其實呢啲食物真係最緊要係新鮮至食得出鮮味,用咗新鮮食材再加埋師傅嘅廚藝唔係太離譜嘅話,都必定要好味嘅!

油浸荀殼~

我作為一隻唔多食魚嘅熊(魚生除外),荀殼都算係少數我會食嘅魚類之一!呢庋個荀殼真係好味到本熊少爺自己鯨吞一條都冇問題!成條魚內嫩外脆,加埋個蒸魚豉油絕對係我嚟呢度必食嘅選擇!

黑麻油雞煲~

聽姐姐介紹講到好似好勁咁樣,點知一埋枱既冇麻油嘅香,賣相亦都唔吸引!衰啲講句我叫個啫啫雞煲嚟食冇咁嬲,起碼有返幾塊豬潤食落好味啲喇!基本上呢一個雞煲嘅感覺,只不過係冇落到辣椒嘅辣雞煲!好話唔好聽我自己喺屋企煮三杯雞,啲朋友都食到舔舔脷啦!所以呢一個真係下次不吃也罷!

後記:雖然本熊少爺好話唔好聽呢幾廿年,大部份時間都係喺旺角、油麻地區打躉,但係隨着年月嘅洗禮⋯⋯以前幫襯過嘅舖頭、識讀過嘅任何人,同埋發生過嘅任何事,都一一敵不過時間嘅巨輪,慢慢地隨着年月咁樣沖淡!但係人類嘅記憶係好奇怪,有一樣嘢會根深蒂固喺記憶裏面嘅,就係食過好味嘅美食味道!我希望呢啲簡簡單單又好味嘅嘢食,喺我有生之年仲可以食得到!


煊記火鍋小菜館 |
油麻地砵蘭街14號地下

唔想錯過我哋嘅內容,記得贊好 hogar.hk Facebook 專頁 youtube 頻道