Menu & Search
【 蠔仔煎蛋、鹵水大腸、魚蛋油麵 】 蒙麵

【 蠔仔煎蛋、鹵水大腸、魚蛋油麵 】 蒙麵

今個禮拜屋企隻熊人仔中咗甲流,搞到本熊少爺同賢內助頭都大埋,熊人仔經過幾日反覆不斷燒下退下,食過特敏福後終於都好返,我亦都要投入返工作。今日約咗好友趷趷剛喺 紅磡 嗰頭傾嘢,全日掛住隻熊人仔,肚空空乜都冇食過就出到去,見趷趷剛未嚟到,本熊少爺急急腳走去一間叫 蒙麵 嘅鋪頭,食碗車仔麵醫醫個肚先至去同佢傾嘢!


【 蠔仔煎蛋、鹵水大腸、魚蛋油麵 】 蒙麵 | 紅磡 | 《羆食堂》

招牌蜜汁叉燒串~

熟悉本熊少爺嘅朋友,都知道我對叉燒嘅要求,就係我特別偏愛肥燶叉!但係呢度嘅叉燒俾我感覺,似係搵豬扒切粒串住嚟燒,雖然佢唔夠肥,但係醃出嚟嘅味道真係唔差!如果你都想試吓嘅話一定需要耐性,往往食晒成碗麵都未燒到出嚟!

溏心鹵蛋~

用上大大隻鴨蛋嚟整嘅溏心滷水蛋,唔係唔好味,但係比起舊舖食到嘅,好似有一啲差咗嘅感覺!

辣味魷魚~

呢度個辣味魷魚,真係可以食得返細路仔嘅時候,喺街邊五毫子一條嗰啲魷魚嘅味道同埋感覺,由舊店幫襯嘅時候,已經必定會叫嘅其中一個餸!水魷加埋類似蠔油般嘅辣醬,真係唔錯!

蠔仔煎蛋、鹵水大腸、魚蛋油麵~

蠔仔煎蛋亦都係每一次必定叫嘅一個餸,件煎蛋大概有八粒蠔仔,雖然係預早煎定,但浸喺湯度真係幾好味!大腸亦鹵得好入味,整體來講成碗面都係好味!

後記:呢間小店真係由佢喺必嘉街已經開始幫襯,雖然搬咗去差館里之後少咗去食,但係整體嚟講味道係可以嘅,不過價錢就真係偏高少少,平均都要成 $80 一個人,值唔值得就見仁見智啦!


蒙麵|紅磡差館里 9-15 號協輝大廈地下 1 號舖

唔想錯過我哋嘅內容,記得贊好 hogar.hk Facebook 專頁 youtube 頻道