Menu & Search
【 柚子白雞湯拉麵 】 葵 Aoi Ramen

【 柚子白雞湯拉麵 】 葵 Aoi Ramen

平時去亞士厘道,十次有九次半都係同啲朋友上去Castro’s,坐喺窗口邊飲住杯 Stella 吹水,望落街𥄫下女,但今日過嚟亞士厘道有啲唔同!因為今日同我為賢內助出嚟省城走走,試問本熊少爺仲邊度敢走上去飲啤酒𥄫女呢?賢內助話因為我生日,所以帶我出嚟 尖沙咀,去 葵 食拉麵!


【 柚子白雞湯拉麵 】 葵 Aoi Ramen Time | 尖沙咀 | 《羆食堂》

柚子白雞湯拉麵 ~

自從早七、八年前,喺河內道某間已結業嘅拉麵舖食過一次雞湯拉麵之後!一直對雞湯拉麵都存在唔多好嘅印象,但係呢一間小店嘅雞湯拉麵令我改觀,清澈嘅雞湯配上拉麵,唔會令人有油膩嘅感覺,食咗幾啖拉麵之後,再將碗邊嘅柚子醬混合湯底,即時令到成碗拉麵清新起嚟,我諗絕對適合一眾鍾意食拉麵,但係又怕肥嘅少女嚟食。值得一讚佢個叉燒都幾特別,佢哋呢度嘅叉燒係有兩件雞叉燒,拼一件豬叉燒!

雞軟骨餃子~

落單前一心諗住,以為都係嗰啲交貨嘅餃子,但上枱竟然係自家手包餃子。餃子味道不過不失,都值得叫碟你試吓嘅⋯⋯

後記:根據我位賢內助睇完啲報道話俾我知,呢間小店原來係幾個後生仔,冇學過整日本拉麵,經自己鑽研多次嘗試,之後開舖賣拉麵,不得不讚。雖然鋪頭細細,但係佢哋嘅拉麵,真係好味過好多所謂日本遠道而來的拉麵店多多聲!


葵 Aoi Ramen Time| 尖沙咀宜昌街6號地下B號舖

唔想錯過我哋嘅內容,記得贊好 hogar.hk Facebook 專頁youtube 頻道 !