Menu & Search
【 日式石板牛排 】  Triple Steak 三ステーキ

【 日式石板牛排 】 Triple Steak 三ステーキ

大家有冇發覺每逢年尾年頭都特別多出街食飯慶祝嘅事情?起碼本熊少爺都真係幾多餐飯要出去食,仲未計年尾要去各大工作夥伴、公司嘅年尾飯!有日我同賢內助放低熊人仔出咗去食餐飯慶祝,賢內助話一直好想試新開嘅 Triple Steak 三ステーキ,既然係咁就一於走去 深水埗 試下呢間餐廳!


【 日式石板牛排 】  Triple Steak 三ステーキ | 深水埗 | 《羆食堂》

牛柳~

400g 有三大塊牛柳喺件燒熱咗嘅石面上,略嫌我呢一塊石唔多夠熱,雖然呢度有換石嘅服務,不過我食牛扒唔需要太熟,所以我冇叫佢換過另一塊!牛柳食落口完全冇肥膩嘅感覺,淡淡的牛香,咀嚼過後慢慢滲入口腔之內!速食店有呢一個水準都算過得去啦!但舊石頭同一時間擺 400g 牛柳,切牛扒嘅時候要特別小心佢跌出嚟!

西冷牛扒~

我位賢內助呢份 300g,都有兩大塊西冷,比起牛柳牛味濃郁一點!不過對於一位女性來講,300g 可能會多咗一啲!

沙律、白飯同湯都係任裝任食嘅⋯⋯


後記:嚟呢度食嘢嘅朋友們都要切記⋯⋯切記⋯⋯切記一樣嘢!呢度食嘢雖然都係 20 分鐘內搞得掂,但係喺門外排隊,分分鐘需要排個幾鐘先至入到去幫襯!想試嘅朋友都真係要好得閒,好多時間先好去排隊,又或者好想試先至好去幫襯!同埋爭啲唔記得咗講,呢度係會隨時計人數截龍!排最尾嗰個店員會交第一個過膠紙牌俾佢喺龍尾拎住。有幸我幫襯完嘅時候,見到龍尾個哥哥仔,問佢借俾我影咗兩張相添!


Triple Steak 三ステーキ|
深水埗欽州街52至54號平安大廈地舖

唔想錯過我哋嘅內容,記得贊好 hogar.hk Facebook 專頁youtube 頻道 !