Menu & Search
【麗都米線】 小鍋米線 | 屯門

【麗都米線】 小鍋米線 | 屯門

今日唔知做乜鬼,本熊少爺幫個朋友準備嚟緊星期日佢結婚啲嘢,仲好忙過平時返工!香港九龍新界走運晒!就算連續兩次返到公司樓下,都上唔到樓就收到個朋友電話,話佢漏咗嘢叫我幫佢手去拎⋯⋯最大鑊仲係要我幫佢飛車走入去天水圍添!下午茶時間都過咗但都未有得食早餐同晏晝嘅我,有理冇理求奇喺屯門停低,搵個咪錶位泊好車,求其見到間米線舖就走咗入去填飽個肚,估唔到本熊少爺好似餓狗搶屎咁,一次過鯨吞咗兩碗米線!


 

炸豬扒~

即炸半肥瘦豬扒熱辣辣又好好味!

 

蒜泥白肉~

蒜蓉嘅調味中規中矩,半肥瘦豬肉嘅厚度亦唔會切到太厚或者太薄!

 

成都酸辣米線~

絕對唔可以攞X哥X仔嗰啲貨色嚟同佢做一個比較!雖然都有用味精,但係感覺上唔會好似啖啖都食緊味精咁樣!最緊要係佢真係有金華火腿粒喺個湯裏便,呢一樣嘢已經值得加分!

 

麗都米線~

我最欣賞係呢一個米線,清甜嘅湯配上鵝腸,自家製鹹酸菜令成個米缐嘅味道更加突出!淨係呢碗米線已經令我會心思思想山長水遠揸架車入嚟食碗米缐嘅衝動!

 

 

後記:真心本熊少爺好日都唔會踏足屯門!戇居居揸架車入嚟除咗搵到呢一間食米線嘅小店之外,竟然發現喺屯門舊墟天后古廟隔離原來有一個花炮展覽館,雖然唔算太大但係都可以有花炮嘅歷史俾大家略懂一二!

 


小鍋米線|屯門新墟井財街15號

唔想錯過我哋嘅內容,記得贊好 hogar.hk Facebook 專頁youtube 頻道 !