Menu & Search
【辛辣明太子飯團】 幸福。駅 | 銅鑼灣

【辛辣明太子飯團】 幸福。駅 | 銅鑼灣

話說本熊少爺有個壞習慣⋯⋯就係最鍾意係返工時間走咗去理髮!早兩日我又返返下工走咗過去 銅鑼灣,搵剪咗我個頭十幾年嘅髮型師幫我修剪啲毛髮。點知佢問我有冇時間幫我搞一搞個新造型,我見橫掂得閒冇咩搞作,就比佢搞一搞喇!點知出嚟個造型根本就係《千王之王 2000》張家輝演嘅梁寬個造型!我即時嚇一跳,然後得啖笑⋯⋯


【辛辣明太子飯團】 幸福。駅 | 銅鑼灣 | 《羆食堂》

剪完頭髮落到樓已經成個天黑晒!見有啲肚餓行行下見到有一間細細間嘅小店,八卦之下走入去睇下,原來係一間名為 幸福。駅 嘅賣日式便當店鋪剛開張。見約咗朋友九點鐘食飯又未夠鐘,我買咗個辛辣明太子飯團醫下個肚。整體來講飯團嘅味道同日本便利店買到嘅好相似,餡料比例亦都算幾多!

後記:呢個基本上咪就係平時我去日本,坐公園嘅時候會買嚟食嘅味道嚟囉⋯⋯搞到我都有啲掛住日本,即刻想買張機票走返轉!我諗如果本熊少爺攞嚟當正餐,隨時可以食三四個都冇問題!呢間小店絕對有下次,睇下幾時行過再試下其他味道先。

 


幸福。駅 | 銅鑼灣禮頓道118號禮信大廈地下5A舖

唔想錯過我哋嘅內容,記得贊好 hogar.hk Facebook 專頁youtube 頻道 !