Menu & Search
【好多朋友談論中 】 女人街食飯公司 | 旺角 |

【好多朋友談論中 】 女人街食飯公司 | 旺角 |

剛剛呢個星期三,我諗都有好多年冇做過嘅嘢,就係晨早流流買份報紙先走去食早餐!我諗有唔少同我差唔多年紀嘅人,都會做呢個行為⋯⋯所以話呢本漫畫真係幾影響到我哋呢一代人!星期三晚應承咗主編朋友去機場接佢機,不過成十一二點先返到嚟香港!既然係咁我即刻捉咗另一個好友趷趷剛,同我落 旺角 陪我試一間近期身邊好多朋友都談論緊嘅餐廳 女人街食飯公司,食住個晚飯陪我等夠鐘入機場!


【好多朋友談論中 】 女人街食飯公司 | 旺角 | 《羆食堂》

 

招牌杏汁燉豬肺~

呢個杏汁感覺上係用咗杏仁霜嚟燉⋯⋯雖然依然有好濃嘅杏香味,但入口飲唔到生磨杏仁嗰份甘香,有一點失色!

 

黑松露鮮蝦多士~

所有朋友推介我嘅蝦多士,唔係唔好食囉⋯⋯但係唔知點解可能我覺得加咗黑松露好似感覺上over咗,食咗一啖嘅時候,我即時諗起主編好友帶我去食過,女人街近亞皆老街有間茶餐廳嘅蝦多士,親民得嚟又好味得多!

 

蒜蓉炒豆苗~

蒜蓉炒豆苗味道係可以嘅,但係分量真係少咗啲!

 

虎皮尖椒豉蒜爆鵝腸~

喺香港坊間食到嘅鵝腸都係急凍貨嚟㗎喇,我都冇期望過⋯⋯呢個汁嘅味道絕對係豉椒炒蜆嘅味道,係好味嘅但略嫌唔夠鑊氣!

 

一口臭豆腐~

可能為迎合一口一粒切得太細粒嘅關係,食落口感似炸豆腐卜。唔知係唔係怕俾人投訴臭味嘅關係,臭豆腐嘅臭味唔太明顯!國產凌凌漆都有教,臭豆腐最出名其實應該係出名臭⋯⋯臭豆腐唔夠臭仲可以叫做臭豆腐?

 

士多啤梨三度腩排~

腩排好似完全冇醃製過咁,成舊肉乜味都冇,只係得外邊嗰個士多啤梨汁嘅味道,有點失色!

 

大叔焗魚腸~

全晚最大碟最飽肚,可能已經係呢一個餸!雖然魚腸分量多兼冇腥味,但啲魚腸苦嘅!

 

後記:周邊嘅朋友都話呢間係近期食得過嘢食好味嘅餐廳。可能我過分期望個落差比較大!其實都係坐街邊食大排檔夠鑊氣啱我啲!

 


女人街食飯公司|旺角通菜街1A-1L威達商業大廈1樓B室

唔想錯過我哋嘅內容,記得贊好 hogar.hk Facebook 專頁youtube 頻道