Menu & Search
【打冷都可以乾淨企理】 明記潮館 | 旺角 | 《羆食堂》

【打冷都可以乾淨企理】 明記潮館 | 旺角 | 《羆食堂》

十幾年前睇電視都有講過『開心買鞋⋯⋯唔開心買鞋!心情好買鞋⋯⋯心情唔好買鞋!好天買鞋⋯⋯落雨買鞋!』,由我喺東京返到嚟香港心情仲未好平復到,有啲掛住日本嘅情況底下百無聊賴,行過街邊啲乜記特買散貨場,竟然見到早前忍手無買到嘅洛文復刻版戰鞋Nike Air Shake Ndestrukt竟然全紅同埋全白都有Size仲特價發售,雖然較早前已經正價入手買咗原色喺屋企冇乜點著過,但係我又點會受得住誘惑唔一次過買晒兩隻色,用嚟左右腳各著一隻色咩!喺我俾緊錢嘅時候好友趷趷剛打嚟問我有冇興趣陪佢打冷飲啤酒,離鄉別井咁多日我又點會唔想食嘢吹下水呢?個衰仔帶咗去 旺角,砵蘭街舊南京戲院原址 明記潮館 打冷!


【打冷都可以乾淨企理】 明記潮館 | 旺角 | 《羆食堂》

滷水雜拼加鵝片~

滷水汁味道中規中矩,!基本上都係合格嘅!但係唔知點解硬係而家走去食潮式滷味,真係食唔翻細個食嗰種滷水味道!

 

椒鹽白飯魚~

近年真係好鍾意叫白飯魚嚟送啤酒,但係好似而家啲白飯魚感覺上越嚟越大條咁樣!外脆內嫩,食幾條飲啖啤酒真係好正!

 

沙嗲牛肉炒芥蘭~

沙嗲牛肉好味、芥蘭都好好食,但係兩樣嘢真係好似完全冇交流咁樣!一啲都唔相襯!完全係蒜蓉炒芥蘭上面,淋上一啲沙嗲牛肉汁一樣。

 

潮州凍大眼雞~

凍魚絕對冇功夫可言,只要條魚夠新鮮煮起再雪凍佢,拎出嚟點啲豆醬,難食極有個譜!唯獨是呢條魚劏魚嘅時候應該劏爆胆,食起上嚟魚肚位置有啲苦澀味!

 

鮮味煲仔焗蜆~

成晚最有驚喜係呢一個餸!每隻蜆都鮮甜多汁⋯⋯絕對值得強烈推介!

 

後記:打冷俾人感覺市井坐得唔舒服污糟邋遢,但係呢一間食肆完全唔會俾人有呢一種感覺!朋友間吹水飲酒,確實又搵到一個新嘅地方值得去下。

 


明記潮館 | 旺角 砵蘭街180號砵蘭180+ 商場 3 樓

www.hogar.hk/uma

www.facebook.com/hogar.hk