Menu & Search
【路邊食碗河粉】 長發麵家 | 深水埗 | 《羆食堂》

【路邊食碗河粉】 長發麵家 | 深水埗 | 《羆食堂》

本熊少爺剛剛掉低隻熊人仔同我女人⋯⋯冇預佢哋走咗去東京,放咗一個悠長假期,好話唔好聽數一數手指,原來已經有六年冇踏足過東京!八日拋妻棄子之旅,我分別去咗伊豆海邊浸溫泉,懶浪漫咁慢步台場欣賞彩虹橋,去茨城睇掃帚草(コキア),又喺築地市場拆前再去多一次,仲有喺新宿街頭撞到熟人添! 呢個旅程除咗掛住屋企嗰兩母子之外,我好掛住菠蘿油凍奶茶同埋潮式湯河!所以一返嚟點都要去食返碗醫下個肚!今次去咗 深水埗 嘅 長發麵家 。


【路邊食碗河粉】 長發麵家 | 深水埗 | 《羆食堂》

 

秘製豉油王撈河~

嚟到呢度我一定會食兩樣嘢,第一樣喺呢度嘅豉油王撈河!豬油豉油經河粉熱力逼出嚟嘅香味,真係配合得天衣無縫!坊間雖然都有唔少店舖都有得食,但係呢度絕對係我頭三甲必食!

 

墨魚丸河~

食完碗撈嘅,我多數會跟手叫多一碗湯嘅墨魚丸河嚟食!呢度個湯底真係用大地魚骨煲出嚟嘅老香港味道!同埋呢度嘅魚蛋、墨魚丸,全部都喺檔邊自家製出品,並唔係外來交貨嗰啲一般貨色!我屋企打邊爐所有嘅丸類食物,一定唔會喺凍肉舖求其買,牛丸、魚蛋、墨魚丸同魚皮餃都會喺唔同地方搜羅返去開餐,墨魚丸我一定首選呢間!

 

後記:因為石硤尾嗰頭舊樓清拆嘅關係,呢間鐵皮大排檔都有一段時間改咗喺隔離鋪頭繼續開檔!不過始終喺大排檔路邊食住碗河粉嗰種感覺,同埋回憶喺舖裏面食完全係兩碼子嘅事!喺大排檔隊住大啤,同檔主吹住水食嘢呢啲老香港情懷,我諗唔知過多幾多年就會冇晒,當啲舊區冇晒大排檔,就冇機會可以將呢個景象延續落去!

 


長發麵家 | 深水埗耀東街14號地下

www.hogar.hk

www.facebook.com/hogar.hk