Menu & Search
【大陸羊肉串燒嘅味道】 老川皇 | 旺角 | 《羆食堂》

【大陸羊肉串燒嘅味道】 老川皇 | 旺角 | 《羆食堂》

今個禮拜,絕對係落雨落到阿媽都唔認得,話說有日喺公司準備收工嘅時候,竟然遇到紅色暴雨兼北區嚴重水浸!屋苑群組嘅鄰居發出圖片見到返屋企嘅唯一一條路,水浸到去到腰間!試問我又點會咁戇居即刻返屋企呢⋯⋯所以即時叫好友趷趷剛收工陪我食晚飯!個衰仔話介紹我落去砵蘭街食好嘢,原來佢係帶我去食四川嘢……


【大陸羊肉串燒嘅味道】 老川皇 | 旺角 | 《羆食堂》


串燒羊肩肉~

呢個羊肉串真係好好味絕對食得到喺大陸食羊肉串燒嘅味道,略嫌唔夠多肥膏!我諗下次嚟我可以淨係叫呢一個十串八串送啤酒!

 

串燒雞全翼~

可能食完個羊肉先至食嘅關係,燒雞翼真係即刻比下去!普通到唔普通,係我角度真係好叫唔叫!

 

干扁四季豆~

炒得唔錯不過唔夠辣!四季豆乾身但偏鹹!對係呢一餐知高鈉嘅食物!

 

辣子雞~

炸得夠乾身細細粒好送酒!好過坊間好多辣子雞!我覺得呢個都可以算係我嚟呢度會叫嘅嘢食之一!

 

干鍋肥腸~

肥腸唔夠肥,味道唔算突出!完全冇辣味,完全唔係喺大陸食嗰個質素!下次可以試吓佢個辣子肥腸睇下會唔會有改善!

 

藍妹生啤~

真係唔常見有藍妹生啤,喺度見到梗係叫番杯嚟啤啤佢!不過飲咗一啖之後都幾後悔!$50一杯仲衰過飲支裝,最終我哋都飲完呢杯之後轉飲返老青島!

 


後記:呢一餐絕對係同自己身體健康作對嘅一餐!食完呢一餐之後搞到我即刻的起心肝做咗幾日運動!等自己良心好過一點!但係美食當前我又點會忍得到口呢!

 


老川皇 | 旺角 砵蘭街114號地下

www.hogar.hk

www.facebook.com/hogar.hk