Menu & Search
【 放入口真係有驚喜 】 金翠餐廳 | 新蒲崗

【 放入口真係有驚喜 】 金翠餐廳 | 新蒲崗

剛剛星期三諗住叫日本分部夜晚返嚟 新蒲崗 ,有啲嘢需要急住叫佢改一改俾返個客,點知個衰仔話最快星期五先有時間同我傾,星期六日先至有時間改!因為實在太趕時間,我寧願等夜啲都同佢傾埋先,喺公司發呆咁等,我悶到就嚟發癲嘅時候,好在隔離公司好友B仔剛收工,有佢同我去咗 金翠餐廳 食飯!


【 放入口真係有驚喜 】 金翠餐廳 | 新蒲崗

沙參玉竹海底椰響螺燉湯~

呢個湯落嘅材料份量都幾足,不過最奇怪就係啲響螺係紫色嘅。冇味精就呃人嘅!不過份量唔算太多仲可以接受!夜晚當有湯水飲都無妨!

 

叉燒飯~

可能一直好友趷趷剛都有同我講,呢間餐廳啲嘢唔食得同埋邋遢,所以令我卻步冇幫襯過,今日阿B帶我嚟食,我預咗係普通到唔普通嘅燒味飯,點知叉燒一放入口真係有驚喜!街邊貨仔嘅叉燒嚟講佢絕對係好食!半肥瘦叉燒入口齒頰留香!麥芽糖同叉燒嘅鹹香配合得天衣無縫!喺一個心情咁差嘅晚上,食乜都無味嘅時候竟然食完個叉燒飯之後,都即刻開心返!

 


後記:
食完餐晚餐送埋好友 B 仔返屋企,喺 B 仔屋企樓下同佢吹咗好耐水⋯⋯竟然日本分部都仲未打電話嚟俾我!最後阿 B 落咗車之後,我按耐不住打電話俾佢,佢竟然同我講而家做緊 gym,要做到 11 點閂門先至走!原來佢一直話俾我聽唔得閑,就係要走去做 gym!真心覺得我一晚寶貴嘅光陰就咁白白地虛耗咗!

 


金翠餐廳|新蒲崗爵祿街36號地下

facebook.com/hogar.hk
hogar.hk