Menu & Search
【叫住雞傾!?】 海外天大馬美食 | 灣仔

【叫住雞傾!?】 海外天大馬美食 | 灣仔

啱啱星期五朝早過咗灣仔,入完動漫展出嚟,打俾日本分部諗住約佢搵間餐廳坐低食飯傾啲嘢,點知佢女朋友話結婚前,唔俾佢出街亂食啲肥膩嘢,但係佢又話條女可以俾去出街叫雞!真係聽到我一頭霧水⋯⋯最爆趣嘅係個衰仔竟然會叫我同佢一齊去,駱克道鵝頸橋附近叫住雞傾!


【出街叫雞!?】 海外天大馬美食 | 灣仔

個人過咗去日本生活果然係唔同啲!我喺馬師路嗰個紅綠燈,等咗個衰仔足足 15 分鐘,先至見到佢慢條斯理地過馬路,帶咗我去一間馬來西亞餐廳 海外天大馬美食 ,原來個衰仔係想帶我食海南雞飯!

 

海南雞飯配生菜~


因為日本分部要節食,同我交換咗碗油飯,同埋俾咗兩件雞我幫佢食嘅關係,我可以一次過試埋呢一個海南雞飯!本熊少爺其實對外出叫雞嚟食要求都幾高,坊間好多舖頭做嘅海南雞都會「冇嚟聞味」!但呢度嘅海南雞意外地,竟然食得到有雞味!但係海南雞飯嘅另一樣關鍵,油飯就略嫌唔夠香!

 

馬來西亞肉骨茶飯~


熬製嘅濃湯藥材味不算太濃,容易入口,但本熊比較鍾意藥材味重一點!肉排不夠入味,感覺有一點似煲湯豬肉。但整體來講都合格嘅。

 

後記:本熊少爺對呢間舖頭本來都唔多睇好,但係有留意之前我講過,灣仔 真係其實冇咩好嘢食,呢間都算係不過不失入得口唔會難食㗎喇⋯⋯起碼真係會有下次!同埋不得不提,呢度個杯白咖啡真係幾好飲,去開幫襯可以叫杯嚟飲下。

 


海外天大馬美食|灣仔駱克道408號地舖

www.hogar.hk

www.facebook.com/hogar.hk