Menu & Search
【 衰極都有個譜!? 】 小蓉麵家 ・ 太子

【 衰極都有個譜!? 】 小蓉麵家 ・ 太子

早兩日要出去金魚街嗰頭約咗個好朋友睇啲嘢,早咗出到去 太子 ,就喺警察會門口咪錶位泊好車。見肚空空未食晏,就喺以前我住過嗰間鬼屋樓下,其實呢條街對於本熊少爺嚟講都盡量避之則吉盡量少走入嚟,因為見過鬼嘅人都怕黑,何況走一返入去自己曾經住過鬼屋嘅呢一條街呢!不過見到有間叫 小蓉麵家 嘅鋪頭,就硬住頭皮行過去食啲嘢。


 

【 衰極都有個譜!? 】 小蓉麵家 ・ 太子

 

雲吞麵~

雲吞麵最主要嘅三個元素:雲吞、麵同埋湯!佢都係我近年食過最唔得嘅!先講佢個湯,既冇大地魚嘅味道亦都冇蝦殼嘅味道,第一啖入口只係飲到濃濃嘅鹼水味,鹼水嘅味道完全蓋個湯其他味道!既然個湯都咁重鹼水味,佢個麵唔使問阿貴基本上都只係食到同一味道!任我點樣加醋落去碗麵度,都蓋唔過佢嗰陣鹼水味。雲吞嘅蝦同豬肉比例係蝦太多,如果雲吞嘅蝦太多成件事會錯晒變咗做一隻蝦餃!

 

後記:

一心諗住賣細蓉嘅地方叫得小蓉,衰極都有個譜喇,好少何餓到仆喺度嘅時候,我都會覺得啲嘢難食!我印象中都好似喺專欄內介紹過七、八間雲吞麵舖俾大家,整體來講我都係贊多過鬧!但係呢一間絕對可以成為我呢個專欄裏面我最不喜歡雲吞麵小店嘅其中一間,所以整體來講呢間小店應該都唔會再有下次幫襯嘅機會!(留意內文下面仲有彩蛋!)

 


小蓉麵家|太子界限街38號地下


 

 

《羆食堂》番外篇
「肥熊人與阿飄的日子」

熟我嘅朋友應該都聽過無數次呢間屋裏便嘅古怪經歷。一次半次古怪事可能係當自己眼花,但住咗唔夠三個月所有嘅怪事接種而來,你就不得不相信呢個世界係有阿飄㗎!大家聽下以下嘅怪事,就會知道當年本熊少爺所租嘅呢一間屋,真係好有問題⋯⋯

 

其實間屋個門口光管每日會無故開關、喺廳度用電腦做緊嘢,房裏邊會發出鍵盤聲音但房內其實係冇鍵盤嘅,而屋企擺玩具嘅高櫃會無故飛晒啲玩具落地下。當年養嘅一隻黑色拉布拉多BB狗,每晚一到 12 點鐘就會對着窗外狼叫,凌晨兩三點瞓上床未瞓着,手腳會突然被掹住,然後聽到好多把唔知講緊乜嘢語言嘅聲音,係你耳仔不斷講嘢。有時行樓梯落樓,落到去喺 5 樓望天井位見到一個灰灰濛濛,見唔到樣嘅長髮女孩,耷低頭企左係度,不自覺急急腳行落 4 樓嘅時候,係同一個天井位置見到同一個長髮女孩繼續企喺度!

搵相熟紙紮鋪睇完,發現真係有啲唔乾淨嘅嘢,決定燒一啲衣紙嘅時候,對住警察會嘅窗外,竟然突然間飛嚟七八隻大烏鴉喺度瘋狂地拍翼同埋尖叫!最得人驚係將契錢放入化寶筒度,所有火焰會無故熄滅。亦係因為種種奇怪事情,最終我都捱唔過三個月就敗走麥城,要搬離呢間屋!

www.facebook.com/hogar.hk

www.hogar.hk/uma