Menu & Search
蒙混過關!? 百好咖啡餅店 ・ 西灣河

蒙混過關!? 百好咖啡餅店 ・ 西灣河

多油嘅程度根本就完全超出咗一個正常地球人可以攝取嘅攝取量…


蒙混過關!? 百好咖啡餅店 ・ 西灣河

剛剛喺大阪地震當日嘅朝頭早返到嚟香港⋯⋯之正所謂有啲嘢係要還嘅!外遊一個禮拜後,所有嘅工作迫晒喺今個禮拜裏面要做返晒,真係忙到完全甩晒轆,本熊少爺個腦袋仲要完全處於閉塞狀態!每一日個腦都 function 唔到,每日都猶如行屍走肉般過生活!早幾日繼續用我嘅喪屍步伐過咗對面海做嘢!呢間 百好咖啡餅店 一睇就知有過去嘅茶餐廳,一心諗住有啲歷史食肆衰極有個譜!點知食完呢餐我完全變咗伏魔小王子!

 

午餐~

茶記必備嘅嘢,常餐、午餐、特餐!雖然由細食茶記食到大,但係其實我都唔係點識有乜嘢分別!我淨係知道好食定係難食,呢一間絕對係後者!先講講佢嘅炒蛋同埋餐包,炒蛋炒都火腿同雞蛋支離破碎,同埋有啲過火都算數啦,最大鑊係佢個餐包,竟然係半個隔夜菠蘿包!個包嘅硬度我懷疑我用力掉出馬路,隨時可以整爆架巴士塊擋風玻璃!個主菜叉燒通粉裏面啲通粉完全係 overcook!竟然可以煮到啲通粉喺個湯裏面發脹晒好似浮屍一樣!真係好少何食到啲咁惡哽嘅茶餐廳午餐!

 

公司燴意粉~

做咗幾廿年人我食過咁多燴意粉,呢一碟只想你會意真係令我會意到呢一碟嘢真係好多油!多油嘅程度根本就完全超出咗一個正常地球人可以攝取嘅攝取量!試想象一下全部食物外層有一層油做保護膜,試問又點會食得到係好味定係難食呢?我嘗試過將啲意粉浸左落去午餐嗰個湯意粉嘅湯度,可以令碗白雪雪嘅湯變成油淋淋嘅橙色湯!成碟嘢我食咗三份一真係哽唔落要放棄了!

 

後記:其實好老實講,茶餐廳嘅食物有幾難整得好味?只要用心嘅話真係好簡單可以做到一間有質素嘅茶餐廳!但係呢一間舊式咖啡室啲嘢食質素,可以話差到一個臨界點,其實點解仲可以咁樣蒙混過關呢?衰啲講句本熊少爺平時返到大陸,都會藐嗰啲國內人開嘅茶餐廳,但味道都真係好食過佢多多聲!

 


百好咖啡餅店|西灣河筲箕灣道 160 號

www.hogar.hkwww.facebook.com/hogar.hk