Menu & Search
一碗麪都唔平 村爺爺 車仔麵 ・ 油麻地

一碗麪都唔平 村爺爺 車仔麵 ・ 油麻地

平時呢個價食碗車仔麵我可能會有啲肉赤……


一碗麪都唔平 村爺爺車仔麵・油麻地

呢排真係忙到人都癲,大家各自忙緊自己負責嘅嘢,少咗坐埋一齊食飯,有時真係忙到拿拿淋食完就算乜都唔講究,等忙完先一齊食過。就連平事最多時間飲飲食食嘅肥熊人都唔例外,早兩個星期仲忙到甩稿,有晚趕住出去做嘢,所以今個星期由我L域代筆,同大家介紹小店美食。有晚做完已經唔經唔覺夜晚十一點,喺油麻地冇乜心水食乜好,咁啱見到有間車仔麵就即刻走入去醫肚,間鋪係油麻地,叫 村爺爺 車仔麵。

 

豬腸、牛腩、蘿蔔、炸雞翼粗麵~


基本上每次食車仔麵我都一定食豬腸,呢度嘅豬腸入口非常之軟熟而有咬口,仲冇乜肥膏,睇得出佢哋事前花咗好多功夫去處理 ,佢個鹵水汁亦都係有「經歷」嘅味道。另一樣每次必定食嘅就係蘿蔔,佢哋個蘿蔔入口無根,呢個除咗係睇佢交貨間菜檔 有冇畀啲好嘢佢之外,就係睇佢員工刨皮時有冇留意個蘿蔔嘅狀態,有時刨深刨淺效果都唔同。另外坊間好多車仔麵嘅蘿蔔都會習慣用冰糖去煮等佢出黎甜啲,而呢個蘿蔔食得出係冇落冰糖去煮,真係食到蘿蔔本身嘅鮮味甜味,咁又真係加分啵!

至於個牛腩基本上係豬腸同一個汁煮出嚟,唔係一般柱侯醬牛腩,不過由於本人對牛腩有一定要求,所以佢哋個牛腩我只係覺得合格未至於好出色。最後一樣餸炸雞翼,其實係我對住個檔諗極都諗唔到食物嘅時候由阿姐推介,平時食車仔麵嘅雞翼通常都係鹵水汁多,佢哋個炸雞翼係有脆皮嗰種,當我見到先知原來係我唔喜歡嘅類型,不過都冇所謂啦都試下好唔好。食基本上佢哋個炸雞翼未至於即叫即炸,不過都應該係每段時間炸少量,所以咬入去裏面都係熱辣辣。



後記:呢間車仔麵仲有另外一個特點就係佢個湯底基本上係豬骨湯同龍蝦湯兩種,我就揀咗龍蝦湯底。由於餸還餸面還麵分開上嘅關係,所以好容易試清個湯底,佢個湯底係的的確確有龍蝦連殼㷛,雖然未至於西式嘅龍蝦湯咁連殼打碎,但係個湯底有好清晰嘅蝦殼味,感覺就好似你食靚雲吞麵舖個湯底有蝦殼嘅味道一樣,感覺唔錯,唯一可惜嘅係我叫咗粗麵,基本上粗麵係唔掛湯,所以湯同麵好似互相唔識對方咁,或者食河粉可能效果會好啲。

 

識得肥熊人嘅人都可能知道佢有一個習慣,就係食車仔麵都叫滿一碗餸,就算好正常嘅價錢佢都可能分分鐘食過百蚊,而我就比佢少,最多都係五六個餸,有時好肚餓就另計,不過今次我保證我冇叫好多個餸,只係簡單四個餸再加粗麵,就收咗我 71 蚊。平時呢個價食碗車仔麵我可能會有啲肉赤,不過以佢嘅質素而且又唔係經常食,我又覺得ok喎,就當係辛苦工作一日之後慰勞下自己。

 


村爺爺車仔麵|油麻地咸美頓街14號地下