Menu & Search
自家製沙嗲汁 印尼沙嗲屋 ・ 筲箕灣

自家製沙嗲汁 印尼沙嗲屋 ・ 筲箕灣

呢間舖仔說實在我都好多年冇去幫襯喇!如果我冇記錯呢間鋪係早喺十幾年之前……


 

自從沖繩返嚟之後真係忙到冇停手!前幾日因為走咗過對面海,上個客間公司度開會,見未夠鐘就走咗去 筲箕灣 東大街睇下有乜嘢食。咁啱同好友趷趷剛傾緊電話,我同佢講而家東大街真係諗唔到乜嘢好食⋯⋯個衰仔一言驚醒夢中人,佢叫我既然諗唔到食乜點解唔走去食 印尼沙嗲屋 !

呢間舖仔說實在我都好多年冇去幫襯喇!如果我冇記錯呢間鋪係早喺十幾年之前,我同趷趷剛喺筲箕灣同一間公司做同事嘅時候,個衰仔介紹我去食嘅,眨吓眼就咁多年啦!

呢度啲串燒其實最主要係食佢個沙嗲汁,個汁絕對係成間舖頭嘅靈魂,坊間嗰啲現成沙嗲醬同呢度自己炒嘅真係蚊比同牛比!我分別叫咗羊肉、雞肉、牛肉、魚蛋、雞腎同鮮魷魚,基本上除咗個牛肉比較韌之外,樣樣都幾好好食,食咗第一啖開始我發覺自己又會再一次上癮啦!

後記:正所謂十年人事幾番新,見到好友趷趷剛有今時今日咁嘅成就,做朋友嘅都好開心!我仲相約咗個衰仔過兩日再去食過添!


印尼沙嗲屋|筲箕灣東大街 76D 地下