Menu & Search
誤打誤撞搵到 土瓜灣.興興餃子館|《羆食堂》

誤打誤撞搵到 土瓜灣.興興餃子館|《羆食堂》

誤打誤撞搵到 土瓜灣.興興餃子館|《羆食堂》


今日外出工作,因為太熱走咗入去 Nike Shop 度過下冷河涼下冷氣,順便睇下波鞋,對買波鞋嘅意欲已經去到心如止水嘅我,竟然被一對純白色 Air Shake Ndestrukt 深深吸引住,有好嘢梗係要返去毒下啲朋友,諗住叫主編朋友一齊買⋯⋯點知被佢當頭棒喝,提醒我明明自己已經有原色就咪鬼嘥啲無謂錢,仲叫我專心努力工作!

經佢咁樣講一講,我唯有死死地氣喺公司做埋我第二日要出走馬交一啲預備工作,點知一做就做到九點幾,我同主編朋友揸咗架車諗住去土瓜灣食碗嗱喳麵先返屋企,點知誤打誤撞行錯路入咗條小巷,裡面所有鋪頭閂晒門,唯獨是有一點燈光見到有間叫 興興 嘅餃子館,因為我哋兩個已經餓到趴咗喺度嘅關係,我哋即時將架車停咗喺門口走咗入去叫嘢食開餐⋯⋯

誤打誤撞搵到 土瓜灣.興興餃子館|《羆食堂》

涼拌土豆絲~

呢個土豆絲嘅味道真係冇得頂,佢嘅醬汁配搭令到碟幼幼嘅土豆絲都真係好醒胃好好味。提起土豆絲我記得十幾年前,我同我老表喺而家已經執咗嘅位於西環德輔道西一間英皇茶餐廳,叫咗碟炒土豆絲夠膽死拎碟炒薯條出嚟,仲要係有波浪紋粗嗰一隻,慶幸當年有相機嘅電話仲未普及,如果唔係我一定影相留底喺度得閑拎出嚟笑下!

 

涼拌豬耳拼雞腎~

基本上都係用咗同一隻嘅麻辣涼拌汁,用筷子夾住幼幼嘅青瓜絲同紅蘿蔔絲一齊食,冇得輸好好味!

 

雞絲涼拌麵~

用上傳統中式芝麻醬及花生醬混合嘅醬,食到舔舔脷,雞絲嘅份量亦都比坊間雞絲伴麵嘅正常份量多,最大驚喜中間係有大豆芽菜口感完全提升!

 

牛肉餡餅~

個餡餅即叫即包,上枱後影咗張相姐姐幫我用鉸剪一開二剪開個餡餅,裏便嘅所有湯汁都漏曬出嚟⋯⋯我敢講佢比起我剛剛好一年前介紹過,尖沙咀柯士甸路嗰間水餃店嘅餡餅出色得多!

 

羊肉煎餃~

我本人覺得佢個牛肉比羊肉出色,水餃個皮唔算太厚,配上呢間舖自家製辣椒油同埋醋,一啖一隻北方食餃子嘅食法滿腹得來又好好味,略嫌煎得未夠乾身,再香口啲可能會更加好味!

 

翠肉瓜蛋餃拼芹菜鮮肉餃~

翠肉瓜蛋餃清新得來幾有新鮮感,,味道又唔差。芹菜鮮肉餃的芹菜味唔夠出但都好好味!

 

芹菜蓮藕鮮肉餃拼酸菜肉水餃~

芹菜蓮藕鮮肉餃其實只係多咗蓮藕,基本上同芹菜鮮肉餃嘅味道係冇分別,但係個酸菜肉水餃真係不得之了,我完全接受唔到佢嗰種酸菜嘅味道!都係嗰句啦⋯⋯佢應該同納豆及榴槤可以歸納埋同一類,鍾意食嘅人會好鍾意食佢隻味,唔鍾意嘅一定無下次!

誤打誤撞搵到 土瓜灣.興興餃子館|《羆食堂》

後記:而家真係實在有太多人會覺得一間食肆,要開喺啲旺區或者間舖有幾大先至會冒名去幫襯,其實我想講,好食嘅舖頭往往就係一啲唔起眼嘅小店,而唔係要大大間開到成行成市先至係美食囉!

 

興興餃子館|土瓜灣浙江街27號地下G5號舖

. . h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k h o g a r h k