Menu & Search
《羆食堂》|粉嶺.群記牛肉圓豬手

《羆食堂》|粉嶺.群記牛肉圓豬手

 

161120uma-02
見北區嫂嫂詐型話我介紹北區成日只介紹上水唔介紹粉嶺,今個禮拜一於就走去搵個老友~ 桑原吹水兼去粉嶺食個晏,個衰公話俾我聽佢朋友一直懷疑有「嗱喳嘢」嗰間屋,喺農曆七月時發生咗件恐怖事⋯⋯話說佢老友間屋唔係用嚟住嘅,只係用嚟切模型同打機,屋主個師傅拎咗隻小鸚鵡放喺廳度暫時寄養。

161120uma-01
在農曆七月十三嗰晚,屋主如常喺模型房裏切緊模型⋯⋯去到半夜隻小鸚鵡係個廳度「鬼殺咁嘈」但屋主冇理到佢,第二朝早屋主喺房走出個廳時,發現隻小鸚鵡大字形咁攤咗係地下死L咗!睇得出小鸚鵡嘅信念完全唔夠,佢嘅死完全係一啲力量影響到佢嘅腦電波,而見到一啲恐怖嘅幻象,仲要佢全身一啲傷痕都冇,其實佢係嚇死嘅。我聽到件事不禁即刻要唱返句”籠中的小鸚鵡♪ 今天也不肯唱♪ 傷心的小鸚鵡♪ 今生再不歌唱♪’

161120uma-06

同桑原走咗去「群記」開餐。呢間小店最神奇之處就係獨沽幾味得幾樣嘢賣⋯⋯豬手、炸卷、牛丸同牛腩。雖然得咁少嘢食但樣樣都好好味⋯⋯

161120uma-03

豬手隻隻即叫即斬,唔用任何滷水只係用鹽水清湯簡單烚熟保持豬手嘅原味,豬肘肉軟熟入味、豬皮軟糯膠質豐腴。所謂炸卷乃係用腐皮捲着新鮮免治牛肉炸成嘅小吃,極重牛肉味齒頰留香,蘸點喼汁惹味香口。牛丸真正吃出牛肉味出嚟,細細粒又很彈牙,嚟到到呢度必食嘅嘢。至於牛腩只是一般貨色,唔難食但冇咩特別⋯⋯坊間俾佢好嘅牛腩多的是!

161120uma-04

後記:群記無論啲姐姐定係老細個個都好有性格!真係完全唔憂做,啲禮貌好到你唔信!但好神奇佢好多嘢都係好早賣完就冇,炸卷大約一點鐘就冇得賣,飯市過後成日都賣晒豬手要等三點後再煮出嚟⋯⋯要食嘅時候真係要碰碰運氣。同埋呢間老店堅持冇裝冷氣,夏天嚟食都幾係嘢㗎!

* 平均每人消費約 $38

 

群記牛肉圓豬手161120uma-05

粉嶺聯和墟聯昌街5號豐景樓地下