Menu & Search
新開張未適應 時新漢堡飽 ・ 紅磡|《 羆食堂 》

新開張未適應 時新漢堡飽 ・ 紅磡|《 羆食堂 》

新開張未適應 時新漢堡飽・紅磡|《羆食堂》 …… 既然同架車已經一早緣盡⋯⋯望多兩眼我就揸車同個夥計走去食晚飯!可能真係往事不堪回首,尋晚見返架舊車,成晚瞓得唔太好,太多嘢諗搞到之後一日冇乜心機返工,一於約主編好友 L域 走去黃埔時新陪我食個晏⋯⋯


新開張未適應 時新漢堡飽 ・ 紅磡|《 羆食堂 》


有晚收工同個夥計喺佢屋企附近食晩飯,喺搵緊錶位泊車嘅時候,突然被一架泊喺路邊嘅車吸引咗我嘅視線,即時停車走去望清楚啲,原來真係我七年前賣咗出去嗰架車!既然同架車已經一早緣盡⋯⋯望多兩眼我就揸車同個夥計走去食晚飯!可能真係往事不堪回首,尋晚見返架舊車,成晚瞓得唔太好,太多嘢諗搞到之後一日冇乜心機返工,一於約主編好友 L域 走去黃埔時新陪我食個晏⋯⋯

講返個故事。就係完全冇心理準備嘅情況底下見返自己曾經擁有過嘅車,嗰種感覺有啲似……一個男人漫無目的由香港去咗新宿旅行,諗緊晚餐食拉麵好定係食牛肉丼嘅時候,忽略見到一位已經冇聯絡而又曾經同自己拍過拖,又嫁咗去日本兼生咗兩個女嘅前出現同你打招呼一樣咁震撼……情況就如呢位日本丈夫都唔知呢位旅客原來係自己妻子嘅 XBF 一樣,呢架車嘅車主都唔會知道本熊少爺係呢架車唔知幾多手之前嘅車主一樣!有啲嘢過去咗嘅唔好諗,唔係真係返屋企晾住揼!講返停業一段時間又捲土重來,由佢地家族二哥鍾奇濤主理的時新漢堡飽。

兒童餐~


真心覺得呢一個套餐幾抵食,$35已經有齊漢堡包、薯條、太陽蛋、一粒啫喱仔同一包維他奶!漢堡包keep得到以前嘅水準幾好味,自家調配嘅沙律醬亦唔差,但可惜薯條就凍冰冰!

 

吉列豬扒、吉列雞扒~

基本上同炸薯條一樣都係一早得炸定,完全係凍冰冰嘅!根本稱唔上係好味!

 

雙層芝士蛋漢堡、炸雞髀~

另外呢一個漢堡包配上港式茶餐廳嘅黑椒汁,真心講好過老麥個黑椒漢堡多多聲!佢哋嘅漢堡包真係無得輸。雞髀雖然唔係生炸,但係味道都唔差不過都係凍嘅!

 

紅豆冰、凍奶茶~

奶茶同埋紅豆冰嘅味道都中規中矩,但係紅豆冰用幼身飲筒,紅豆完全吸唔到有改善嘅空間!

後記| 我當日 14:19 成功買飛搵位坐低,一直呆等到 15:26 啲嘢食先出到嚟⋯⋯足足等咗一個鐘頭!仲要為咗等埋個漢堡包,其他食物一齊出嚟嘅時候都已經攤到凍哂!雖然個漢堡包係好味,但買飛繼計起要等成個鐘頭先至食到,值唔值得就真係見仁見智!希望老闆唔好忘記我細細個已經去幫襯嘅時新係一間叫做快餐店叫小店。希望而家只係啱啱新開張未適應到所以有啲混亂啦!

 

時新漢堡飽|紅磡德康街398-402號黃埔新天地家居庭地下G22-G23號舖