Menu & Search
上海三日兩日 其之二 上海生煎包大比拼|《羆食堂》

上海三日兩日 其之二 上海生煎包大比拼|《羆食堂》

上海三日兩日 其之二 上海生煎包大比拼|《羆食堂》

今個禮拜繼續同大家分享下我呢個上海之旅嘅點滴。其實早喺出發之前我已經做咗一啲功課,關於生煎包邊間好啲,只是一個短短嘅旅程我竟然食咗好多次生煎包!既然係咁,不如同大家嚟一個上海生煎包大比拼!

首先我喺網上搵到啲關於生煎包發酵嘅資料,皮可以分簡單用「全發酵」、「半發酵」同「冇發酵」三種發酵方法去分別:

「全發酵」的麵團是加酵母揉好後,醒發約 15 分鐘後,包好餡料之後再醒發約半小時。因經過兩次醒發,口感厚而鬆軟近似包子。

「半發酵」的麵團是加入酵母揉好後,直接包餡料後再根據氣溫醒發一會,夏天一般是 15 分鐘左右,而冬天可能長達 30 分鐘。由於厚度適中,口感較為鬆軟近似肉夾饃嘅饃。

「不發酵」其實較少有生煎是用完全不發酵的麵團,即使小楊生煎也會加少許發酵粉。揉面後直接包餡隨即下鍋煎,沒有發酵過程只是讓麵團在製作中稍微醒發。口感較薄而韌,近似蒸餃但略微鬆軟些。

 

今個旅程我分別試咗全發酵嘅大壺春、半發酵嘅豐裕,同不發酵嘅小楊生煎!


 

大壺春・人民廣場

有車軚人美食推介嘅大壺春,說實在真係唔係我杯茶!未出發前周邊所有人都叫我,一定要走去食呢一間嘅生煎包,但一放入口去感覺上似係細個幫襯鍋貼鋪嗰啲香煎菜肉包,佢個皮太厚感覺似食緊饅頭。雖然內有湯汁,但係裏便啲餡料豬肉感覺上好似用咗好多醬油調味,蓋過咗啲豬肉本身嘅味道。

大壺春|人民廣場浙江中路117號(近廣東路)


 

豐裕餐飲・南昌店

餡料豬肉好味但毫無湯汁!一心諗住因為半發酵個皮唔會太厚,但竟然啱啱相反,個皮好厚仲要極之漿口,可能係煎嘅時候,湯汁完全吸晒係個皮度,令到個皮完全唔掂仲有啲難食!

豐裕生煎|瑞金二路41號(近南昌路)


 

小楊生煎・巴黎春天

去到大型百貨公司地牢,特許經營嘅小楊生煎叫咗一個三拼生煎。俾錢嘅時候,個餐牌明明寫住係有原味生煎、大蝦生煎、藤椒魚肉,但係坐低咬開嘅時候,發現個魚肉生煎竟然變咗做薺菜生煎!生煎包嘅皮薄有肉汁好好味。但整體而言,除咗個原味生煎包係好味之外,其他都真係唔多得!大蝦生煎啲蝦竟然係臭蝦!薺菜餡料雖然幾好味但係唔係好襯生煎,如果係包餃子嘅話應該味道唔錯!

小楊生煎|淮海中路939號巴黎春天B1層(近陝西南路)

 


 

小楊生煎・人民廣場

因為食唔到黑色墨魚皮藤椒魚肉生煎包嘅關係,第二日嘅朝早我走咗再食多一次,今次唔係去啲商場下面啲food court,因為我要排隊幫襯對面嗰間小籠包店,所以今次係買咗一盒外賣企喺街邊食。慶幸個大蝦生煎係冇臭味嘅⋯⋯但係感覺似係食緊蒜蓉蝦餃囉!不過呢個黑色,墨魚皮藤椒魚肉生煎包真真正正出咗事啦!只係輕輕咬咗一啖就發現腥到完全放唔到入口,裏便嘅餡料除咗完整一舊嘅淡水魚肉之外,佢竟然加咗啲不知名嘅魚子喺裏面令到一粒平平無奇嘅包子腥上加腥!呢粒包絕對係我今次喺上海食過最難食嘅嘢食!

小楊生煎|人民廣場黃河路97號(近鳳陽路)

 


 

後記:雖然我身邊有一個對生煎包熟悉嘅朋友,叫我一定要去試舒蔡記,話呢間生煎好正,但因為行程嘅時間所限我去唔到試!

呢個行程我試咗呢三間上海生煎包小店唔計當中嗰啲奇怪嘅味道,普通豬肉生煎包本少爺覺得小楊生煎最好味!未出發去上海之前,成日聽人講香港起晒朵嗰間生煎包,水準參次完全唔係上海嗰皮,經過自己親身去試過之後,其實香港嗰間水準都唔差㗎喇⋯⋯起碼本少爺覺得好食過豐裕同埋大壺春!

今個上海之旅令我若有所失的,就係一心諗住去到可以買埋唯一一個我買唔到嘅銀魂紀念品香辣海鮮杯麵,最後竟然都買唔到!慶幸返到嚟喺天貓見到有得買,即時俾錢買埋佢!