Menu & Search
【 好味之外仲多份味道 】 麵匠風龍

【 好味之外仲多份味道 】 麵匠風龍

雖然都算得上係一個麪痴,不過日本拉麵好多時都留返去日本先食。即使近年喺香港有好多日本拉麵店「被」引入,不過好多都因為水土不服,嚟到香港變咗另外一樣嘢,所以對於我嚟講,喺香港可以食嘅拉麵的確十隻手指都數得曬。其實呢間喺 灣仔 嘅 麵匠風龍,好多時去會展做嘢前後,又或者過開灣仔都會經過,而特別多人嘅日子,忽然之間你會感覺得到一陣涼風,你就知你經過呢間拉麪舖。


豚骨湯拉麵

如果有食開日式拉麵嘅朋友都知道,其實湯底唔計魚介同雞,淨係豬骨都有好多唔同嘅取向,呢度嘅豬骨湯底偏向白身,感覺上似博多係有少少油喺面,但係湯底清新到可以飲得曬嘅類型,至於叉燒,佢哋係用慢煮製作之後,上畀客人前會用火槍輕輕炙一下,入口都香口,不過肉身偏瘦少咗油香。至於啲青蔥,新鮮嫩口。

蝦味味噌拉麵

至於蟹味噌呢個湯底,感覺上唔算太濃,啖湯入口唔嗆,而且佢哋加入櫻花蝦,所以味道都幾香口。至於佢啲溫泉蛋同粟米,正常貨色。

替玉

講返呢度拉麵嘅面身,其實佢畀我哋食開嘅日式拉麵偏向幼身少少,但係又未至於好似博多天神嗰隻超幼麵,食起上嚟同坊間嘅日本拉麵都幾唔同,而麵身冇帶蛋味所以都幾夾湯汁,唯一可惜係有少少鹼水味。

小龍蝦蟹子沙律

作為前菜,呢個小龍蝦蟹子沙律其實幾可口,當中小龍蝦肉都唔算少,通常用紫菜包住嚟食,幾好味。

餃子

日式餃子通常都係統一餡料做法,所以決勝位就係佢嘅包法同煎出嚟嘅效果。咁食入口佢哋都ok嘅,最緊要都係新鮮包而絕對唔係一般冷藏德用貨色。


後記:整體嚟講,風龍絕對係有下次嘅拉麵舖,有時太耐冇飛日本,都想搵間拉麵鋪嚟慰藉一下個胃。而且呢間拉麵鋪,絕對係情感上加分,有留意佢地嘅話你自然明我講乜。


麵匠風龍
灣仔軒尼詩道184號

唔想錯過我哋嘅內容,記得贊好 hogar.hk Facebook 專頁 youtube 頻道