Menu & Search
《有圖先傾》日本家電大變天

《有圖先傾》日本家電大變天

我想食你,你想食佢,十足十愛情故事……


上個星期,布魯圖先講過日本SHARP的賣盤消息,而潛在買家正是台灣的鴻海集團,時隔一星期,情況又再有變動,今次新加入的角色,是香港人同樣熟悉的東芝Toshiba。

SHARP因財困問題,從而被迫走上重組、甚至賣盤之路,其實受財困問題困擾的日本家電生產商,又點止得SHARP一間,東芝Toshiba去年因做假賬,而被日本政府重罰73億日元,一樣頭痕到爆,日前就有報導,話東芝積極搞合併,其中一個目標,當然是SHARP。

而且,此方案一曝光,就即刻受到日本産業革新機構 (INCJ)推波助瀾,原因不難理解,第一,兩個日本品牌,自行融合,依然是日本品牌,起碼不會變成「日本牌,台灣心」。第二,東芝手上擁有核反應爐技術,若然貿貿然與其他品牌合併或賣出,技術亦都會因此曝光,講到咁,就並非單單賣家電品牌咁簡單。

最後,呢場大龍風,會搞到幾時呢?有消息指,應該三月前就要有結果,仲有兩個幾月,分分鐘仲有好多變數。

(網上圖片)