《羆食堂》|上水.杜記茶餐廳

今個禮拜,住北區嗰對夫婦朋友出發去咗佢哋個越南越愛之旅,真係不禁要唱番兩句:「無謂那樣見外♪林氏越南越愛♪ 為你手信在期待♪」趁着佢兩公婆唔喺香港,又係我走去介紹一下北區小店之時⋯⋯   腐乳豬扒飯(炒底)~ 估唔到腐乳嘅香同煎豬扒會咁夾,腐乳不太鹹好好味!記得記得識得食一定要叫姐姐炒底,成個飯層次感即刻高出幾班!   鹹魚煎肉餅飯~ 雖然都整得好好味但鹹魚香味不夠,厚厚嘅肉餅其實都做得唔差,只係佢個鹹魚令到個飯扣咗啲分⋯⋯成也鹹魚敗也鹹魚,如果佢用過另一隻魚香味重啲嘅鹹魚,應該會更加好味!   後記:聞說呢一間老店屹立上水幾廿年,仲好似馳名盆菜添。用膳期間正值老闆忙於做緊盆菜,可能佢見到我嗰個貪心樣,仲請我食幾舊南乳炆豬肉添!天氣涼啲嘅時候不如訂返個盆菜返公司開餐先! * 平均每人消費約$50   杜記茶餐廳 上水新健街15號地下

2016-10-09
《羆食堂》|新蒲崗.魚鱻魚湯專門店

收到老死贈我同太子哥嘅籃球衫,我開心到即時走去拎咗 Ricky 仔支私家咪唱起歌來:眼看你控球再上籃♪ 穿針一刻竟睜不開眼♪ 球場裡追逐♪ 從來沒有人♪ 這麼耀眼♪ 我敬仰眼神擦了板♪ 籃球員為何面孔這麼冷♪ 射出的電流♪ 如何地較準♪ 如男兒入樽不必撞板♪。慶賀佢公幹後返港,今日午餐一於由我嚟萬歲⋯⋯食好西!話說老死歡喜路德圍嗰間魚鱻最近喺新蒲崗開咗分店,今日餐晏我地走咗去試試。   椒鹽龍利球~ 薄薄嘅炸漿包住魚肉炸得啱啱好外脆內嫩!   招牌炸魚餅~ 用招牌鯇魚滑炸成嘅魚餅,淡淡魚香,不過小心好多碎骨!   自家製潮州炸魚片~ 賣相極似蝦片,浸落湯或者就咁食都好好味⋯⋯少少鹹,多多脆,飲啤酒一定要食佢!  

2016-10-02
《羆食堂》|紅磡.三河屋

最近接二連三身邊啲朋友個個都走晒去旅行,有啲朋友仲好似一早約定排晒隊去東京,一個返到嚟一個又出發!呢排忙到甩轆冇時間出發!好巴閉咩喺度放毒,搞到我喺公司唔能夠專心計數,我不禁又喺個位度對住對面準備出發嗰個老死大聲胡亂唱歌,「我沒法共你邁向花都♪也沒有路費♪心齋橋上去散步♪列車中♪也可理想達到♪月台在飛走♪東京景緻沒有♪東涌風景也尚算能獨有♪」唱唱下佢手上竟然多咗一支黑色壘球棍,我只好即時收聲! 諗住收拾心情嗱嗱聲做埋啲嘢去食飯,點知個啱啱東京返嚟嘅朋友打嚟問我嘢,跟住吹水間話俾我聽佢跟同事喺東京嘢食又好食、又新鮮⋯⋯收線之後我即時秋官上身又高聲唱起歌來「講到食料理梗係香港仲多啦♪諗番喺日本亂食嘢真係傻♪加埋機票錢早知今日何必當初呢♪香港長大都咁多年♪就算再唔風光都係一時♪好過走去外國亂咁洗錢♪不如儲錢過二千年囉♪」(真心覺得公司內所有人都認為我係癡線嘅!)嬲嬲地就唔信香港食唔到好味嘅日本嘢,靈光一閃即時諗起黃埔有間小店,即刻打俾某個損友叫佢陪我食個晏抒懷一下!   北海道忌廉烏冬~ 忌廉汁濃稠適中質感香滑,紅蘿蔔薯仔亦都煮得好淋好入味~   明太子飯團~ 大大嚿飯團中間放滿明太子,熱辣辣新鮮做出嚟~   咖喱吉列豬扒飯~ 豬扒外層香脆鬆化 ,跟咖哩配合得天衣無縫~   炸吉列薯餅~ 薯仔蓉與牛肉混為一體熱辣辣好食到不得之了~   鹽燒牛脷、串燒雞軟骨~ 跟損友叫了二合純米吟釀所以叫多咗兩客小食,熱得香口送酒一流! 不過最衰今日冇漬物熒光魷魚如果唔係呢餐飯更加圓滿~   後記: 老闆兼大廚五十嵐修來港多年,佢曾經同我講過佢之前係喺唔記得銅鑼灣定尖沙咀開高級料理餐廳,最後因為租金問題輾轉轉戰紅磡區,一間平民化日式餐廳感覺其實有啲似深宵食堂~每次去親紅館睇演唱會呢度係我嘅不二之選!冇得去東京嘅我只能夠食飽飽行去黃埔隻船嗰度行AEON Style Store⋯⋯沿途酸流流地唱住”如果東京不快樂♪ 鐵塔亦能快樂♪ 巴黎無快樂♪”

2016-09-25
《羆食堂》|大埔墟街市豬扒麵大比併

最近無論電視,收音機、報紙周圍都見到聽到『官商鄉黑勾結』,令到不問政治嘅我想起兩年前嘅一套電影《竊聽風雲3》,所有嘢根本就好相似。住喺新界東嘅朋友仔之前九月四日,有冇投票俾劉青雲呀?喺公司聽聽下晴朗本熊少爺又突然神經刀在公司高歌一曲:「是誰令青山也變♪變了俗氣的咀臉♪又是誰令碧海也變♪變作濁流滔天♪」,我諗我都係時候買定支 卡拉OK咪喺公司、方便我技安上身即刻唱返兩咀!不過我驚公司其他人一定會拎定棒球棍侍候⋯⋯

《羆食堂》|尖沙咀.北京水餃店

最近睡眠質素嚴重欠佳,一個星期內連續三晚發夢,香港淪陷有喪屍橫行,晚晚發夢諗用乜嘢方法可以擊退喪屍。身邊好友仲夠膽死叫我去睇嗰套韓國喪屍片!有時間我都喺公司補一補睡眠瞓多兩個鐘啦。因相約了客人要到尖沙咀傾嘢,我只好把枱面支葡萄適喝清光後,猶如喪屍般死下死下由公司出發去到尖沙咀,星期五下午兩點幾啲酒吧仲未開門兼個客仲未到,冇食早餐嘅我唯有走去食水餃醫醫肚先。   羊肉大蔥餃子 大大隻厚皮京式餃子,但餡料內的羊肉完全冇羊應有嘅膻味,點一點辣椒油及醋,一口一隻老北京吃法~   麻辣冷麵 都已經到了秋天但仲係咁熱,來一客冷麵,冷麵上面鋪滿麻辣肉碎,少少咸香但麻辣不足。   羊肉大蔥餡餅配豆漿 已經千叮萬囑千其唔好剪開個餡餅,上菜時依然係幫我一開四,所有湯汁都漏曬出嚟,令到原來美味嘅餡餅失色了!明明我一個人食你幫我剪開分享俾邊個呢?   後記:可能真係租金問題,一隻熊走去食個午餐一碗水餃、一碟冷麵及餡餅配豆漿(其實係自己大食咗啲)竟然要一百二十幾!還記得表弟仔仲係Poly讀書時水餃都好似係廿零三十蚊碗,而家買到成五十蚊真係「乸脷」咗啲喇! 平均每人消費約 $80   北京水餃店 尖沙咀柯士甸路15號B,A2舖

2016-09-04
《羆食堂》|尖沙咀.Candies Foodies

最近喺網上睇到一個關於三個男仔友誼嘅故仔,話說三個男仔由七歲開始做乜都一齊,細個時仲三個約定大家長大成人之後一齊做生意,廿幾年後佢哋真係實現咗三個嘅童年承諾!睇到呢個故仔後,咁啱今日工作完又疲累地出咗尖沙咀,所以我都去咗呢度感受一下呢三個麻甩佬嘅熱血!   忌廉粟米湯 不像一般茶餐廳罐金寶粟米湯開水之貨色, blend 碎的粟米跟忌廉湯融為一體~   地中海茴香石蠔濃湯 blend 碎咗嘅蠔令濃郁蠔味衝擊味蕾,但個湯稀咗少少,如果杰身一點口感會好啲~   海鮮冬陰公天使麵 因為係貌似龍心嘅老闆介紹所以叫咗呢個天使麵,夏日炎炎冬陰公嘅酸辣能令胃口大開,老闆果然冇介紹錯~   香草焗大肥菇配黑松露醬意式燴飯 Risotto的硬度控制得幾好,不像坊間大部份餐廳做到淋淋的,但黑松露醬過多,蓋過了 Risotto 其他的味道,我諗廚師需要控制一下松露醬的份量,有改善空間!   真空慢煮澳洲草飼肉眼牛扒(8安士)配牛肝菌燒汁 經過十個鐘頭真空慢煮,肉質鮮嫩不加其他調味已能吃出肉的鮮味~  

2016-08-28
《羆食堂》|尖沙咀.Alma PortugueseGrill

百無聊賴嘅星期五因為朋友仔公司friends & family sales,所以走咗去佢公司睇吓有冇平嘢買,但我發覺年紀大有時出尖沙咀令人太累♪ 世界之最♪ 登上更空虛♪ 逛了幾逛冇咩特別啱心水,見既然喺一個海港只得一個嘅海港城,即刻打電話俾兩個 buddy 約佢哋出嚟happy hour。其中一個 buddy 提議去食吓葡式小食飲嘢吹水,我二話不說走咗去搵位,點知真係食到一肚氣!其實平時我都係如果唔啱食至多下次唔幫襯,唔會寫出嚟費事影響到人,但呢間真係不吐不快要寫出嚟呻兩句!   炸馬介休薯球 中規中矩之作,但馬介休比例少了一點!   葡式肉腸拼盤 點估到叫得做肉腸拼盤,竟然係寥寥可數幾片臭煙燻味 Salami 加幾粒士多啤梨同無花果乾,面頭加多一棵薄荷葉夠膽死收百幾銀一客,我真係完全唔識欣賞囉!  

2016-08-21
《羆食堂》|西環.新興食家

最近經常性失眠呆坐到天光,星期六晚望住個天花板,一個人坐喺屋企悶悶地喺度等運到,不如打俾朋友約去飲早茶。一心諗住揸車上大帽山川龍村,點知個老友佢竟然喺銅鑼灣耀華街蒲緊,唯有揸車過海接埋佢落西環食早餐啦!點知被捉咗上去樓上吧同佢班老友吹水吹咗幾個鐘,落樓時已經天已光,架車仲食咗張牛肉乾添!唉,有理冇理揸車走去西環食早餐。   糯米雞完全係舊式茶居的味道,鹹蛋、火腿條、雞件、臘腸⋯⋯大大嚿配合得天衣無縫~   燒賣 唔係一般集團式酒家由廠房運到翻蒸嘅燒賣,燒賣啲豬肉肥瘦適中新鮮喺廚房蒸出來~   鵪鶉蛋燒賣 膽固醇超標點心之代表作,一定有同朋友仔同行分享先好叫~   蝦餃 半月形餃皮呈現半透明。餡料有蝦、豬肉、筍。不失為一隻優質美味嘅蝦餃。   流沙奶黃包 奶黃包熱辣辣,大啖咬落去奶黃餡的流哂出黎,辣親個咀。鹹蛋黃碎鹹香惹味,雖然偏向油膩但好香口,必食。   黑椒豬肚 黑椒味唔夠香,但豬肚都總算不過不失~   雞扎 腐皮卷著雞肉、火腿、魚肚,芋頭好味到我不禁又亂咁唱出「望住四寶雞扎♪可嘆現實係要一隻鴨♪加塊荔芋共我一起扎♪」  

2016-08-07
《羆食堂》|新蒲崗 Delight

星期一 Blue Monday 仲要話有個風球妮坦打到嚟,完全冇心機工作。本少爺肌膚底下層嘅魔性又咗召喚我去滋擾其他人工作,見到我個老死努力趕稿中我同佢講個風就打到嚟,我勸佢早點歸去,佢說佢不想歸去。老死話就算完成工作都有個好 funny 嘅哥哥仔會嚟搵佢,要等埋佢先至走得,點都唔肯跟我車早啲收工返屋企。我唯有坐喺度等佢交埋稿之後叫埋老友 Ricky 仔,同日本分部走去食住午餐(其實當時個時間已經過咗下午茶時間)慢慢等嗰個好 funny 又遲遲未到嘅哥哥仔!   Delight All Day Breakfast 煙肉、薯餅、腸仔、火腿、煙三文魚、牛角包、烤番茄、蘑菇、茄汁豆、沙律菜,一碟滿足晒所有願望真係老少鹹宜又好味~   Classic Egg Benedict 菠菜碎、煙火腿、鬆餅、荷蘭汁,汁香濃睇賣相已經好想食。一切落去 水煮蛋煮得恰到好處,蛋黃流出來食落去好有層次感非常有水準~  

2016-07-31
《羆食堂》|大埔三小姐海鮮小菜

上星期大暑日跟好友去完書展,炎炎夏天大家都不想回家煮飯,諗諗下不如直車入大埔墟街市上面食晚飯,星期五尚算多人,去到三小姐老闆即時安排咗張枱俾我地。見到老闆咁幫手不禁想對住佢唱呢首歌:「問句蒼天蒼天點知道♪一捽只Dee仔晌呢度♪我就眉飛叻兼色舞♪輸左又第鋪♪學下中英雙方講數♪又黎玩過♪無謂躁♪尋日至執笠又開番鋪♪」點解要對個老闆唱?呢首係咩歌?如果你想咁樣問,我會跟你說:「少年,你太年輕了!」   豆腐魚湯 因下面就係街市貨源新鮮不是問題,但敗筆在太重味精了!   豉椒炒聖子 雖然不算大隻但好鮮好好味   椒鹽鮮魷 炸槳太厚完全不合格   小炒王 蝦干、腰果、魚肉、西芹炒得夠火喉,不過若然係用蒜芯會更加美味   椒絲腐乳通菜 通菜用上燒熱嘅鐵煲仔上枱,熱辣辣好好味~   蒜香骨 蒜香骨係全晚最好味嘅一個餸,送酒一流!   後記:雖然在街市大排檔食晚飯,常常給人感覺街市人多是嘈雜而又一地水,但有時我就是喜歡這感覺。飯後跟老闆傾過幾句說說食物質素,他還送了紅豆涼粉給我們作甜品,這種人情味就是令我會到小店的理由了。 平均每人消費:約$130