2016-07-03
《羆食堂》|天后甘飯館

因為自從日本分部返咗嚟香港之後,冇咗佢幫手寄嘢返嚟,早兩日我走咗去SOGO 11/F 買參考書,之後百無聊賴地在百德新街逛逛,正值午飯時間有個老友知我在港島區話請我食飯,叫我諗食乜嘢,最近腦閉塞都唔知食乜好,喺度諗緊食乜好嘅時間,突然間哼出呢首歌「站在大丸前♪♪♪細心看看我的路♪♪♪再下個車站♪♪♪到天后♪♪♪當然最好♪♪♪」好,一於就約個老友去天后叫佢請我食燒鵝! 皮蛋酸薑 鏞記的招牌小食皮蛋,皮蛋來自同一供應商,口感同樣軟滑香濃,皮蛋外層剔透,色澤通透, 煙靭彈牙。加上溏心蛋黃,美味非常。酸薑味道醃製得宜,爽口酸甜而不太辣。食完後口腔充滿酸薑香氣。果然是家族的名物   生煎肝腸粉 潤腸切件放在略煎過的多士上,顯得潤腸份外甜美濃郁   燒鵝 燒鵝皮雖然唔肥啖啖肉但肉質欠些彈性,鵝皮也不脆,比起以前在鏞記買消燒鵝飯外賣,略嫌水準不繼。值得一提碟底有蠔油豆,啲舊式燒味鋪先會有,豆吸晒鵝汁,好味   鹹魚茸煎肉餅 鹹魚打茸, 均衡嘅肥瘦肉比例, 加上少少馬蹄。吃下有肉鮮, 口中有彈性, 加上馬蹄爽脆, 鹹魚鮮香惹味  

2016-06-26
《羆食堂》|何文田天馬快餐

    早兩日聽電台嘅〈扭蛋劇場〉,不得不佩服主持人借《聖鬥士星矢》諷刺電視台嘅一個講怪獸家長嘅節目,內容十分到肉,什麼一月出世嘅人,先有資格繼承人馬座嘅聖衣做聖鬥士!就要做星矢、個仔做唔到主角。大個咗會好似冰河阿瞬啲二打六咁一世都比星矢騎住、佢係喺聖域出世,佢不愛聖衣但聖衣會找上佢……。   慶幸我生於幾十年前並唔係係生於這個時代,爸媽對我雖然嚴厲但也不至於去到怪獸家長地步,諗起從前逢星期六晚追看聖鬥士星矢,不禁在公司不理其他人嘅目光,大聲唱出幾句星矢主題曲來「無敵嘅聖衣♪ 金光璀璨好美麗♪ 唔係鐵♪ 係聖衣♪  著咗打都打得勁啲♪」。唱唱下又去到午飯時間,我即時打俾個老死約佢食飯,佢竟然突然間好孝順咁返咗去愛民邨探 Auntie,諗住唔阻住佢做孝順仔,但佢竟然叫我上愛民邨食飯。一提起愛民邨食嘢,我就即時諗起冬菇亭粥舖,不過酷熱天氣警告唔係諗住同我坐冬菇亭呀?我即時諗起商場裏邊有間天馬快餐,一問之下竟然仲未被領展趕走,二話不說就約佢喺天馬等。   羅宋湯 勁足料,煲得夠火喉味道又濃郁,帶點微辣飲一碗已經夠飽肚   天馬什扒飯 腸仔、煙肉、餐肉同豬扒,回憶當年去愛民邨同學屋企時食嘅味道,蕃茄汁完全無得輸,煎豬扒大大塊又夠鬆,食一盒一定夠飽   咖喱豬扒飯 咖哩汁好美味,雖然佢肯定唔係可媲美其他咖喱店嘅咖喱味道,不同佢係回憶中學生哥時代食過,嗰種類似葡汁嘅咖喱汁味道,因為佢個咖喱同時用嚟炆牛腩,所以汁內仲有細細舊牛腩肉添。略嫌吉列豬扒細塊咗少少同有少少硬   茄汁牛脷意粉 佢嘅另一名物係茄汁燴意粉,最欣賞係佢嘅意粉每一條都沾滿晒茄汁,並唔係就咁淋啲汁上去面頭,牛脷亦都大大嚿  

2016-06-19
《羆食堂》|上水辛鮮火鍋料理

剛過去端午節長假期大家有冇攞多日假出國旅行呀?雖然本熊少爺星期五都攞埋嗰一日假,但係就冇去到旅行留喺港陪屋企人出去遊下車河,晚飯時揸咗架車約一對好友夫婦食晩飯,大熱天時提議我去食雞煲。一於睇下係咪真係咁好食先。   招牌四川麻辣雞鍋 有乾辣椒、洋蔥、芫茜、花椒八角等等等等嘅材料,雞肉份量都夠雖然冇乜雞味但都幾滑,因要就返朋友叫咗小辣,若然中辣或者大辣應該會好味好多!   招牌牛拼盤 $298嘅呢碟牛拼盤抵唔抵食就見仁見智啦,不過如果食麻辣湯底的話,我好贊同我身邊一位鹹濕嘅朋友話齋,叫啲最普通嘅美國急凍肥牛都已經足夠,因為麻辣湯底會蓋過牛肉本身嘅鮮味!   牛拼盤+$1.00嘅即炸響鈴 睇得出唔係交貨一盒盒嗰啲,好味有下次   鮮粉腸、蟹棒、黑柏葉、雜丸拼盤 鮮粉腸爽甜⋯⋯其他都係火鍋配料都係一啲現成貨,不過不失啦   手打杞子豬肉丸 用新鮮豬肉加入杞子打成,彈牙美味   炸魚皮 魚皮大大塊卜卜脆好好味   皇帝菜 麻辣湯底最適合陪嘅蔬菜我首選芫荽同皇帝菜  

2016-06-05
《羆食堂》|新匯聚餐廳小廚

不怕神一般嘅對手只怕豬一般嘅隊友!呢句說話真係幾時講都咁有道理㗎,一心諗住星期五放工唔好刻薄自己食好啲,一於走去觀塘食吓大排檔啤啤佢,雖然係去工廠大廈嘅一樓,但依度嘅炒小菜水準好味過好多街邊嘅大排擋好多,準備叫嘢食嘅時候我個電話突然響起,原來又係個客打嚟又有投訴!我叫同行嘅朋友隨便叫住啲嘢食先⋯⋯ 約15分鐘後我傾完電話返嚟,我被同行依班大帝嚇親,我哋四個人食晚飯竟然夠膽死叫咗十個餸!人哋唔知以為成班啱啱放出嚟添!我發覺有時真係有啲人你睇少眼都唔得,一睇少一眼就出事啦! 蜂蜜欖角骨 略謙佢嘅欖角味道不夠出,整體來講都好醒胃好好味 酥炸咸豬手 記得之前食過外脆內軟,但今次再食皮一啲都唔脆仲好韌,不過皮下嘅豬手肉鮮嫩咸香美味,不用配芥辣沙律醬已經好夠味道   蒜蓉炒西蘭花 中規中矩嘅一碟炒西蘭花,但我已經覺得係唔錯㗎啦!因為坊間有好多食肆連炒一碟好食嘅西蘭花都做唔到   家鄉炆狗仔鴨 上枱熱辣辣香噴噴味道係唔差,但鴨肉有點韌及鞋,不是我杯茶!   醬燒牛仔骨 可能同一晚有太多類似嘅肉類食物,我真係覺得呢個牛仔骨麻麻地,因為佢嘅對手實在太出色喇,下次試吓唔叫其他嘅肉類睇吓會唔會好味啲先   沙薑炆芥菜 沙薑味跟芥菜呢個配搭真係幾特別,值得大家一試   藕餅併蝦丸 藕餅鮮甜美味又彈牙,旁邊嘅蝦丸雖然都彈牙好味但都即時比下去  

2016-05-29
《羆食堂》|太和三多(順興)小食

人生不如意事十常八九,永遠都捱過黑暗過後就有曙光,但我幾時先見得到黎明呢? 本週繼續因工作導致負能量極重!收工時間揸住架車,返屋企時汽車音響隨機播放出一首歌:「捱過哭過知我的背上♪無數刀傷♪傷得這樣♪漂亮♪猶似一個自尊的肖像♪叫頑強♪流過鮮血都當痕癢♪」雖然係平平無奇的一首歌,但都提醒咗有順景逆景嘅先至係人生,有經歷嘅往後睇返都會為自己而自豪。為咗唔帶啲負面情緒返屋企,架車啱啱經過大埔,一於食下嘢平衡心理先至返屋企。   其實一早已經好多人,叫我有時間入去大埔試佢隻雞髀,去到太和呢一間鋪頭,我叫咗一隻雞髀同一杯黑牛。先嚟咗杯朱古力雪糕配上可口可樂嘅黑牛,都好耐冇試過係街外飲到。依家咁熱嘅天氣飲一啖真係透心涼,同埋即時記起小時候飲黑牛嘅感覺~   大概十分鐘後,即炸嘅雞髀送到埋枱,隻雞髀芳香撲鼻,面頭放滿勁辣嘅四川辣椒碎,裏邊肉汁豐富,同我早兩個禮拜去到元朗我食嗰隻咁嘅乾爭爭炸雞髀比實在差得遠,整隻雞比評分我都覺得會比好高分。 後記:我覺得如果隻雞髀走辣會好一啲,其實啲四川辣椒碎有少少格格不入,本身隻雞脾已經好好味。同埋炸雞髀硬係覺得應該要搵個雞皮紙袋揸住喺街邊行變成會適合啲!大家不妨試吓外賣唔堂食都可以。   三多(順興)小食 太和翠樂街11號美豐花園地下1號舖

2016-05-22
羆食堂|尖沙咀 BBQ 7080

熊人話:「我只盼♪ 這裡有天♪ 變回樹♪ 撤回路♪ 」真係俾佢激死,山材道就山林道喇!唱乜鬼嘢出嚟呢? #BBQ7080 #韓燒放題 【網址】http://www.hogar.hk/column/uma/160522uma/ ============================= 更多 hogar.hk 精彩資訊: 【訂製啱頭形專屬枕頭 My Makura「我的枕頭」】http://goo.gl/VSCmkD 【抽真空至保鮮 FOSA真空儲存套裝】http://goo.gl/4wJxnn 【直接拎出飯檯 Hitachi RZ-WS2YH 迷你手提式IH電飯煲】http://goo.gl/bsUcN8 【用烤肉針幫你煮靚扒 Bosch Series 8 焗爐】http://goo.gl/MLFDYI 【蒸氣消滅致敏源 Electrolux前置式蒸氣洗衣機】http://goo.gl/ZLNI8B

2016-05-15
《羆食堂》|元朗萬芳冰室

星期五下午工作又唔多順利,又係時候揸架車走去,睇下有乜下午茶好食平衡一下負面心情。見到啲飲食雜誌同朋友話有間生炸雞髀好好味喺元朗,我諗都唔諗就喺公司揸咗架車遊個車河入元朗,但最終我食咗餐近年最差嘅下午茶!平時如果食咗啲唔好食嘅嘢,我多數提醒自己下次唔好再去,但今次我食過呢間聽到個個話好食嘅老字號,真係不得不同大家分享一下。   生炸無敵雞髀配薯條~ 雖然雞髀喺上枱時熱辣辣睇得出係即叫即炸,但我一放入口感覺放咗件樹皮入口咁,又鞋又硬又乾又冇味,只係吃得出有一點油膱味!最慘係連雞皮都硬到揼得死人食到我牙口都痛埋,最後我都放棄冇食晒,無謂辛苦自己。 紅豆冰~ 用上肥大飽滿嘅天津紅豆,味道尚算中規中矩,但偏甜了一些。   咖喱魷魚配魚蛋仔~ 咖喱汁好味又夠香,魚蛋用上細粒唔係大大粒打邊爐嗰啲魚蛋低讚⋯⋯但魷魚完完全全冇咖哩味,跟酒樓食嘅白灼生菜魷魚根本冇分別,薯仔亦都完全係白灼薯仔嘅味道,佢個 Menu 仲夠膽死話係推介,我好想知道佢嘅賣點係乜野!   原隻蝦多士~ 食炸雞脾時已食到一點油膱味,放呢件蝦多士入口,我即時想大師上身拍枱大嗌一句:「出事喇!」大家試想下麵包放落去有油膱味嘅油炸吸晒所有味道會係點?整體來講一間餐廳主打係炸物嘅話,個油嘅品質係好重要㗎!希望呢間食肆會明白喇!   瑞士汁雞翼~ 全個下午茶最好味嘅一樣嘢,雞翼整得好入味又冇雪味。   家味菊花茶~ 食咗咁多熱氣嘢都整返支菊花茶飲下⋯⋯佢哋用咗一啲模仿汽水樽嘅玻璃樽來裝住幾特別,睇得出佢哋係有心嘅,菊花茶味道唔甜用嚟清清喉嚨好味。 後記:雖然我見到隔離枱有啲其他食客,食嘅例如乾炒牛河同炒飯都好似好吸引咁,我都想鼓起勇氣下次再試試,但我諗都係冇下次架啦,除非有朋友陪我入去食啦!  

2016-05-08
《羆食堂》|九龍城昌發泰國粉麵屋

同我一齊長大嘅表弟仔將被迫遷了,佢即將要離開住咗成廿幾年嘅屋企,同我個靚表妹(即係佢家姐)搬新屋,個衰仔執屋執到死下死下,一於車去落九龍城食餐好嘅。   魚肚羹 所有人去到泰國餐館都只會叫冬陰公嚟飲,但嚟呢度一定要叫佢個魚肚羹,味道真係好有喺泰國唐人街食泰式煲仔翅嘅味道。大大嚿嘅魚肚再加埋雞肉冬菇,同少少胡椒味道,包保一試難忘!   鴨肉湯金邊粉 湯底用上花椒、八角、豬骨及芫荽根等多種香料煮成,但最重要係原來加入了豬血,令湯味更鮮甜濃郁。喝一口湯,再加上泰式調味架上嘅辣椒醋,好味到停唔到口。   烤豬頸肉湯河 湯底冇鴨肉湯河個湯底咁濃,小小燶邊嘅豬頸肉亦都好香口,但河粉太過粗同厚唔係我杯茶。   馬拉盞炒通菜 成餐飯唯一敗筆,完全食唔到通菜嘅鮮味,只係食到鹽嘅鹹味,鹹到根本食唔落!不提也罷。 後記:雖然呢間小店其貌不揚,但好食過好多間九龍城出名嘅泰國菜館,尤其是佢嘅湯粉,真係好有泰國路邊用膠袋裝外賣啲河粉嘅味道!不過唯一缺點就係九龍城真係好難泊車!   昌發泰國粉麵屋 九龍城城南道27號地下

2016-05-01
《羆食堂》|上水廣成冰室

  今日心情欠佳揸住架車四圍亂咁走走,架車直飛到上水即時記起自己原來未食早餐,即時諗起不時都會幫襯嘅一間懷舊小店,泊好車喺門口咪錶,諗住入到去一定多人到不得之了,好彩一早嚟到唔駛點等位就有得食。入到去其實可以連餐牌都唔駛睇就可以馬上落單,因為佢地嘅特色係得早餐同茶餐!其他嘢食好少人會單獨點嘅(除咗紅豆冰)! 牛肉通粉 湯底以薑絲和鮮牛肉以大火快煮出嚟,牛肉沒有用梳打粉處理過,有嚼口嘅鮮牛肉口感係唔同啲嘅!加一點桌上嘅冠益辣椒油,樸素少年時打完波,一班死仔有屋企唔返坐茶餐廳回憶嘅味道出晒嚟! 菠蘿包 夾咗一塊不夠大片嘅牛油,麵包尚算新鮮但不是熱辣辣的。但面頭嘅皮尚算香脆。因為佢地嘅餐包只會放喺冰室嘅門口玻璃櫃度。 奶茶 作為一間迄立上水幾廿年嘅老店,個茶胆比例唔好味就死得喇!杯熱奶茶嘅香滑濃配合得天衣無縫,完全無懈可擊,抵讚! 後記:只有早起身嘅雀仔有嘢食嘅道理,早啲去就唔需要點等位都可以食到個早餐。如果想食佢個經典紅豆冰嘅朋友,咁就要晏晝先嚟食啦! 廣成冰室 上水石湖墟新成路10號

2016-04-24
《羆食堂》|香港人的味道:雲吞麵

上星期睇電視,有位電影老闆兼全國政協委員林先生喺一個訪問話:「如果有間雲吞麵鋪是全港最好餐廳,你會唔會服氣?」我想講雲吞麵係陪伴每一個真正香港人成長嘅。我敢肯定雲吞麵絕對係可以代表到香港嘅美食!今個星期我就每日去不同嘅麵店,為大家介紹幾間我會去食嘅雲吞麵。 元朗 深仔記 最近都主要呢幾日喺附近地方工作,其中一日我去咗合益路附近嗰間深仔記食晏,餡料蝦跟豬肉比例約8:2,蝦肉彈牙但麵殘留點點鹼水味,有待改善! 深仔記 元朗建業街88號仁義大廈地下A舖 新蒲崗 英記美點小食 鮮蝦雲吞、六十年代撈麵全蛋幼麵,  全冇絲毫鹼水味兼爽口彈牙,配豬油和醬油調味,絕對係老香港嘅味道。正宗雲吞係細細粒容易食,大家仲可以試試加一點桌上醃辣蘿蔔,可提鮮味道。 如大家個肚仲有空間可試試門外菜餃和燒賣~ 新蒲崗康強街32-34號康強洋樓10號地舖  元朗 好到底麵家 做麵專家個麵真係唔同啲,濃郁有蛋香,而且湯底大地魚味道十分清甜。雲吞皮薄料足, 蝦肉彈牙。   好到底麵家 元朗阜財街67號地舖   旺角 大隻佬麵家 由細幫襯到大,在黑布街冷巷內嘅龍記,搬咗入舖後改名叫「大隻佬麵家」,我不時都會都幫襯。雖然我最愛佢嘅豉油皇炸醬撈河,但今日叫咗碗雲吞麵,有一點鹼水味,而且麵身略為軟淋,不過雲吞水準依舊出色,肉和蝦比例3:7,爽口軟熟度剛剛好。 大隻佬麵家 旺角黑布街97號地下