2019-07-07
【 東江鹽焗雞 】 中央飯店

花膠鴨絲羹~ 好耐冇見過有鴨絲羮呢樣嘢係坊間舖頭出現,基本上鴨肉份量少咗啲,食唔出嘅味道,似普通一個瑤柱花膠羹多啲,但整體來講都係好味。 東江鹽焗雞~ 熊爸爸平時都咁鍾意食雞,一落機都話十幾日冇食過蒸雞,試問做仔嘅本熊少爺又點會唔叫俾佢食呢?基本上呢個鹽焗雞都係一般中規中矩嘅鹽焗雞,可能我覺得中規中矩其他人會覺得好味!因為作為一個對雞好有要求嘅我,真係好難係我把口講:街邊食雞係好好味! 紅燒元蹄~ 基本上炆得夠時間夠淋但係唔多夠味,呢一個餸需要濃味但係入口來得清淡! 欖角蒸魚雲~ 本熊少爺完全唔食淡水魚嘅關係,呢一味餸純粹係熊媽媽要求叫嚟食。熊媽媽聲稱欖角味道唔死鹹,不過可惜魚雲唔夠鮮味! 京都焗肉排~ 其實我真係唔明白由幾時開始每次同熊人仔出街食飯都必定有一碟京都骨、咕嚕肉、生炒排骨、中式牛柳等…等…等…等…等…等。呢一啲菜式!其實好老實係某程度上呢啲餸千篇一律都係差唔多嘅味道! 後記:呢間就胡中創辦經營六十幾年嘅客家菜館,而家已經頂咗手俾飯店嘅得力伙記繼續經營。呢啲舊式飯店收費又唔係貴平均七十幾蚊一個餸,收工一班老友飲下啤酒都係一個好地方。不得不提本熊少爺一踏入商場已經覺得熟口熟面,原來就係之前睇過古天樂同喳喳輝嗰套《使徒行者》中,主要飯店場景就係呢一度!作為爛片王嘅本熊少爺又點會唔記得呢? 中央飯店 |深水埗大埔道140號東盧大廈地下 唔想錯過我哋嘅內容,記得贊好 hogar.hk Facebook 專頁同 youtube 頻道 !

2019-06-22
【 山城牛肉麵 】 山城小麵

今個禮拜,本熊少爺架熊人號牌費到期又未寄返嚟,搞到今個禮拜返工都真係行多咗路。早兩日假期前夕,喺深水埗福榮街嗰邊做完嘢,但係眼見福榮街嗰啲鋪頭真係冇乜意欲走入去幫襯!喺肚空空又諗唔到食乜嘢,漫步行落去太子嘅時候,我竟然俾一間平時本熊少爺我打句問句見到個門口,都一定唔會入去幫襯嘅小店,佢個抽風位噴出嚟嘅氣味,吸引左我入去望吓佢係賣啲乜嘢!最後我竟然走咗入去,食咗一個我估佢唔到嘅午餐!

2019-06-02
【 招牌養心麵 】 養心麵

好友趷趷剛一直都研究緊今年我哋要衝出香港,拓展業務去東南亞地區,一直十劃都未有一撇,但係嚟到今個禮拜有發展,當地同我地接洽嗰便嘅合夥人,突然間叫我地兩個一齊出發走去當地開會!走得太突然嘅話,香港嘅嘢都要留低個人處理,趷趷剛臨上機之前一晚捉咗我出去尖沙咀,飲杯嘢順便交低呢個禮拜有啲乜嘢我走去處理。但係個衰仔竟然自己喺公司附近食完「鱻」先出嚟尖沙咀,我肚空空喺 尖沙咀,冇理由唔自己食返啲嘢先至同佢傾。求求其其走咗入去呢間 養心麵 速食碗麵,先走去同個衰仔飲燒酎傾公事!

2019-05-19
【 老壇子酸菜魚 】 深圳 太二

啱啱過去嗰個星期六,一朝早帶住熊人仔同賢內助跟住外母,返咗去佢鄉下 沙井 探賢內助個婆婆食個晏晝飯,兼且慶祝母親節,食飽飯返咗去婆婆屋企,啲長輩打麻雀嘅打麻雀、打機嘅打機⋯⋯就連熊人仔都喺佢姨婆間房部電視,搵到佢平時最愛睇嘅《Paw Patrol》,完全無視咗我兩公婆。咁啱我位賢內助最近成日提起想上 深圳 食酸菜魚,既然咁好機會,即刻叫佢舅父揸車,車我地兩公婆去拍下拖食返餐酸菜魚!

2019-04-28
【咖哩牛坑腩伊麵】 洪強原味清湯腩咖喱專門店

復活節長假期,本熊少爺一家約埋熊人仔啲朋友,走咗去黃金海岸酒店,近近地度個假。狂歡之後,一心諗住近近地走去 屯門 ,食之前介紹過嘅小鍋米線先返屋企。點知過到去,發現屯門嗰間小鍋米線已經執咗,但係已經到咗熊人仔同佢個女仔朋友午飯時間之後瞓晏覺!我哋唯有急急腳,喺附近求其走入一間鋪頭,諗住餵飽佢兩個小朋友,跟住速速返屋企比佢哋瞓晏覺!點知誤打誤撞搵到一間叫「洪強原味清湯腩咖喱專門店」,原來有驚喜!

豬扒麵
2019-04-21
【 豬扒麵 】 興發麵家

忙碌咗成個幾月今個禮拜終於完工!趷趷剛個衰仔喺交貨日開始連續發燒發咗幾日!完全冇見過個衰仔,喺佢開始發燒之前我最後一次見到佢,就係帶我嚟 長沙灣 興發麵家 呢間小店食咗個下午茶!趷趷剛先生已經多次同我強烈推介,呢度個炸豬扒上海麵叫我嚟試下。

2019-03-31
【 咖喱牛腩配豬仔包 】 澳門 氹仔林記燒烤

平時星期六、日都會係本熊少爺嘅家庭日!我極少會放低我位賢內助同埋熊人仔喺屋企,自己走咗出去仲要唔返屋企!事緣啱啱過去嘅星期日要去 澳門 傾啲嘢見見客,其實都有諗過帶埋佢哋兩個過去,但一諗到帶住熊人仔舟車勞頓,又坐車又坐船即刻打消呢個念頭⋯⋯最後自己出發做嘢,順便過 氹仔 林記燒烤 食下嘢!