2018-10-28
【打冷都可以乾淨企理】 明記潮館 | 旺角 | 《羆食堂》

十幾年前睇電視都有講過『開心買鞋⋯⋯唔開心買鞋!心情好買鞋⋯⋯心情唔好買鞋!好天買鞋⋯⋯落雨買鞋!』,由我喺東京返到嚟香港心情仲未好平復到,有啲掛住日本嘅情況底下百無聊賴,行過街邊啲乜記特買散貨場,竟然見到早前忍手無買到嘅洛文復刻版戰鞋Nike Air Shake Ndestrukt竟然全紅同埋全白都有Size仲特價發售,雖然較早前已經正價入手買咗原色喺屋企冇乜點著過,但係我又點會受得住誘惑唔一次過買晒兩隻色,用嚟左右腳各著一隻色咩!喺我俾緊錢嘅時候好友趷趷剛打嚟問我有冇興趣陪佢打冷飲啤酒,離鄉別井咁多日我又點會唔想食嘢吹下水呢?個衰仔帶咗去 旺角,砵蘭街舊南京戲院原址 明記潮館 打冷!

2018-10-21
【路邊食碗河粉】 長發麵家 | 深水埗 | 《羆食堂》

本熊少爺剛剛掉低隻熊人仔同我女人⋯⋯冇預佢哋走咗去東京,放咗一個悠長假期,好話唔好聽數一數手指,原來已經有六年冇踏足過東京!八日拋妻棄子之旅,我分別去咗伊豆海邊浸溫泉,懶浪漫咁慢步台場欣賞彩虹橋,去茨城睇掃帚草(コキア),又喺築地市場拆前再去多一次,仲有喺新宿街頭撞到熟人添! 呢個旅程除咗掛住屋企嗰兩母子之外,我好掛住菠蘿油凍奶茶同埋潮式湯河!所以一返嚟點都要去食返碗醫下個肚!今次去咗 深水埗 嘅 長發麵家 。

2018-10-07
【燒肉唔脆皮?】 永合隆飯店 | 太子

【 燒肉唔脆皮? 】 永合隆飯店 | 太子| 《羆食堂》 啱啱過咗嘅中秋節,大家有冇一家大細坐埋食完飯賞下月食下月餅呀?我就因為一盒月餅,喺外家俾一個無謂人語帶譏諷單單打打,一心諗住想撩交打!唔知乜嘢事,本熊少爺竟然睬佢都有味當嗰條友仔隱形,帶咗熊人仔返屋企繼續賞月!第二日追月,本熊少爺冇假放要繼續返工,中午時分見口淡淡,一心諗住假期食好啲,所以去咗 太子 的 永合隆飯店 去食燒味!

2018-09-23
【宵夜飲茶】 馬仔記客家菜館 | 上水 | 《羆食堂》

剛剛過去呢個星期真係成個香港,都俾阿比卡超局長口中嘅「天竺」吹到散晒!嚴重破壞全港!風暴過後樹木倒塌、瓦礫處處,交通嚴重癱瘓市民仲要迫車返工!而本熊少爺屋企所有人都喺一場風暴中冇損傷⋯⋯只係屋企個洗衣房全個被風吹到散晒,都算係不幸之中嘅大幸!【宵夜飲茶】 馬仔記客家菜館 | 上水 |《羆食堂》

2018-09-09
【在灣仔的元朗麵舖】 元朗合隆潮州粉麵 | 灣仔 | 《羆食堂》

今個星期懶洋洋完全唔想返工,早兩日仲靜雞雞走咗去睇歡樂早場!呢套《未來的未來》情節笑中有淚真係幾感人,戲中主人翁『小君』無論表情定係啲撒嬌行為,都有啲似本熊少爺屋企嗰隻熊人仔添!完場走出嚟泊咗架車喺摩理臣山咪錶位,就係活道附近求其搵間舖頭食個晏先返工

【大陸羊肉串燒嘅味道】 老川皇 | 旺角 | 《羆食堂》
2018-09-02
【大陸羊肉串燒嘅味道】 老川皇 | 旺角 | 《羆食堂》

今個禮拜,絕對係落雨落到阿媽都唔認得,話說有日喺公司準備收工嘅時候,竟然遇到紅色暴雨兼北區嚴重水浸!屋苑群組嘅鄰居發出圖片見到返屋企嘅唯一一條路,水浸到去到腰間!試問我又點會咁戇居即刻返屋企呢⋯⋯所以即時叫好友趷趷剛收工陪我食晚飯!個衰仔話介紹我落去砵蘭街食好嘢,原來佢係帶我去食四川嘢……

2018-08-12
【 放入口真係有驚喜 】 金翠餐廳 | 新蒲崗

剛剛星期三諗住叫日本分部夜晚返嚟 新蒲崗 ,有啲嘢需要急住叫佢改一改俾返個客,點知個衰仔話最快星期五先有時間同我傾,星期六日先至有時間改!因為實在太趕時間,我寧願等夜啲都同佢傾埋先,喺公司發呆咁等,我悶到就嚟發癲嘅時候,好在隔離公司好友B仔剛收工,有佢同我去咗 金翠餐廳 食飯!